no images were found
सुनील मोदी यांचा पुणे पदवीधर मतदारसंघासाठी शिवसेना ठाकरे गटाकडून उमेदवारी अर्ज
कोल्हापूर(प्रतिनिधी):- शिवसेना ( उद्धव बाळासाहेब ठाकरे) पक्षप्रमुख उद्धवजी ठाकरे यांच्या सूचनेनुसार पुणे पदवीधर मतदारसंघाच्या निवडणुकीसाठी शिवसेना उद्धव बाळासाहेब ठाकरे पक्षाच्या वतीने कोल्हापूरचे नगरसेवक सुनील मोदी यांनी आज उमेदवारी अर्ज दाखल केला.
उमेदवारी अर्ज दाखल करताना शिवसेना उपनेते व कोल्हापूर लोकसभा संपर्कप्रमुख अरविंदभाई दूधवडकर, पुणे शहरप्रमुख व महाराष्ट्र राज्य संघटक वसंत मोरे, तसेच कोल्हापूर दक्षिण उपशहरप्रमुख युवराज खंडागळे यांच्यासह पुणे पदवीधर मतदारसंघातील पाचही जिल्ह्यांतील प्रमुख पदाधिकारी आणि शिवसैनिक मोठ्या संख्येने उपस्थित होते.
पुणे पदवीधर मतदारसंघाची निवडणूक शिवसेना उद्धव बाळासाहेब ठाकरे पक्षाच्या वतीने संपूर्ण ताकदीने, एकजुटीने आणि संघटितपणे लढण्याचा निर्धार यावेळी व्यक्त करण्यात आला. पक्षप्रमुख उद्धवजी ठाकरे यांच्या नेतृत्वाखाली पदवीधर मतदारांपर्यंत पक्षाची भूमिका आणि विचार पोहोचवून निवडणुकीत विजय मिळविण्यासाठी सर्व पदाधिकारी व शिवसैनिकांनी एकदिलाने काम करण्याचे आवाहन करण्यात आले.सुनील मोदी यांच्या उमेदवारीमुळे पुणे पदवीधर मतदारसंघातील राजकीय समीकरणांना वेग येण्याची शक्यता असून, आगामी काळात प्रचाराला अधिक जोर येणार आहे.
