डीकेटीईमध्ये आवाडे दादा यांच्या वाढदिवसानिमित्त संशोधनाला नवी दिशा

Oplus_131072

डीकेटीईमध्ये आवाडे दादा यांच्या वाढदिवसानिमित्त संशोधनाला नवी दिशा

इचलकरंजी(प्रतिनिधी):-डीकेटीईचे अध्यक्ष, आदरणीय कल्लाप्पाण्णा आवाडे यांच्या ९६ व्या वाढदिवसानिमित्त डीकेटीईतर्फे उत्साहपूर्ण वातावरणात त्रिवेणी कार्यक्रमांचे आयोजन करण्यात आले. शिक्षण, संशोधन आणि नवोपक्रम यांचा संगम घडविणा-या या विशेष सोहळयात डीकेटीईने डिझाईन पेटंट प्राप्त केलेल्या समाजउपयोगी प्रकल्प ’बेड कम व्हीलचेअर’ हे अ‍ॅड प्रिती पटवा यांना दादांच्या हस्ते देण्यात आला. कार्यक्रमाची सुरुवात संस्थेचे अध्यक्ष कल्लाप्पाण्णा आवाडे, माजी मंत्री प्रकाश आण्णा आवाडे, माजी नगराध्यक्षा किशोरी आवाडे, उत्तम आवाडे, मानद सचिव डॉ सपना आवाडे, कार्यकारी संचालक रवी आवाडे यांच्या हस्ते दीपप्रज्वलनाने झाली. या कार्यक्रमामध्ये साहित्य, सेवा व सूर यांचा त्रिवेणी संगम अनुभवायला मिळाला.
डायरेक्टर डॉ एल.एस.आडमुठे यांनी उपस्थितांचे स्वागत केले तर माजी मंत्री प्रकाश आण्णा यांनी दादांच्या वाढदिवसानिमित्त राबविण्यात आलेल्या सामाजिक उपक्रमाचे कौतुक करीत आवाडे दादा यांच्या दूरदर्शी नेतृत्वातून डीकेटीईमधील प्राध्यापक व विद्यार्थी यांनी डीझाईन केलेले बेड कम व्हीलचेअर तंत्रज्ञान हे रुग्णसेवा अधिक सुलभ, सुरक्षित आणि परिणामकारक करण्याच्या उददेशाने विकसीत करण्यात आलेले आहे असे नमूद केले. डॉ सपना आवाडे यांनी या कार्यक्रमाप्रसंगी संस्थेच्या वतीने दादांना दीर्घायुष्य लाभो यासाठी मनोकामना व्यक्त केल्या तर अ‍ॅड प्रिती पटवा यांनी माझ्या गरजा लक्षात घेवून बेड कम व्हीलचेअर हे उपयुक्त प्रोडक्ट विकसीत केले आणि ते प्रदान केले याबददल आभार व्यक्त केले. प्रा.सचिन कानिटकर, डॉ.मंजुनाथ रावळ, डॉ अश्‍विनी रायबागी, डॉ गिरीश मेकळके, प्रा. राहुल जोशी व बी.टेक. मेकॅनिकलचा विद्यार्थी शुभम कोळी व त्याच्या सहका-यांनी बेड कम व्हीलचेअर या संकल्पनेची यशस्वी प्रत्यक्ष निर्मिती केली.
यानंतर दादांचा ९६ वा वाढदिवस साजरा करण्यात आला. अ‍ॅड प्रिती पटवा यांच्या प्रेरणादायी जीवनावर प्रा.एस.जी.कानिटकर यांनी शब्दबध्द केलेल्या मनोबला या मराठी पुस्तकाचा प्रा.डॉ.ए.ए.रायबागी यांनी इंग्रजी अनुवाद केलेल्या पुस्तकाचे प्रकाशन झाले. त्यानंतर डीकेटीईचे माजी विद्यार्थी दिपक फडके,अतुल कुलकर्णी व राजेंद्र गलगले यांनी आपल्या सुरेल गायनाने उपस्थित श्रोत्यांची मने जिंकली. सदर कार्यक्रमास आवाडे कुटुंबीयातील सर्व सदस्य, डीकेटीईचे सर्व ट्रस्टी, डीकेटीईचे विविध शाखेचे विभाग प्रमुख यांचेसह सर्व शिक्षक व शिक्षकेत्तर कर्मचारी, माजी विद्यार्थी आणि पटवा कुटुंबीयातील सर्व सदस्य उपस्थित होते आभार डे.डायरेक्टर डॉ यु.जे.पाटील यांनी मानले.