गोकुळ निवडणूक – भाजप 29 जून रोजी शक्ती प्रदर्शनाने ठराव दाखल करणार

Oplus_131072

गोकुळ निवडणूक – भाजप 29 जून रोजी शक्ती प्रदर्शनाने ठराव दाखल करणार
कोल्हापूर (प्रतिनिधी):कोल्हापूर जिल्हा दूध उत्पादक संघ अर्थात गोकुळच्या निवडणुकीसाठी ठराव दाखल करण्याची लगबग सुरू आहे. भाजप, शिवसेना, राष्ट्रवादी काँग्रेस आणि जनसुराज्य शक्ती पक्षाने महायुती म्हणून एकत्रितपणे या निवडणुकीला सामोरे जाण्याचा निर्णय घेतला आहे. त्या अनुषंगाने जिल्हाभरातील दूध संस्था प्रतिनिधींशी संपर्क साधून ठराव गोळा करण्याचे काम युद्धपातळीवर सुरू आहे. गोळा झालेले हे ठराव एकत्रितपणे शक्ती प्रदर्शनाने सादर करण्यासाठी 29 जून रोजी कोल्हापुरातील महासैनिक दरबार हॉल येथे व्यापक मेळाव्याचे आयोजन करण्यात आले आहे. या मेळाव्याला राज्याचे उच्च व तंत्रशिक्षण मंत्री चंद्रकांतदादा पाटील, खासदार धनंजय महाडिक,आमदार शिवाजीराव पाटील, राहुल आवाडे, माजी मंत्री भरमूअण्णा पाटील, दीपक पाटील, माजी आमदार संजयबाबा घाटगे, प्रकाश आवाडे, समरजीतराजे घाटगे, भाजप महिला मोर्चाच्या प्रदेश उपाध्यक्षा तथा गोकुळच्या माजी संचालिका शौमिका महाडिक, माजी संचालक अंबरीश घाटगे, धैर्यशील देसाई, विश्वास जाधव, जिल्हा परिषद उपाध्यक्ष तानाजी पाटील, गडहिंग्लजच्या माजी नगराध्यक्ष स्वाती कोरी,शिवशंकर हत्तरगी, प्रकाश चव्हाण, अशोकराव चराटी (अण्णा), पद्मजा आपटे, उमेश आपटे, संजय सावंत, पी.जी. शिंदे, प्रताप पाटील कावणेकर, ग्रामीण जिल्हाध्यक्ष नाथाजी पाटील, राजवर्धन नाईक निंबाळकर, विजय महाडिक यांच्यासह ठराव धारकांच्या उपस्थितीत सहाय्यक निबंधक (दुग्ध) कार्यालयाकडे हे ठराव दाखल करण्यात येणार असल्याची माहिती आमदार अमल महाडिक यांनी प्रसिद्धी पत्रकाद्वारे दिली आहे.
29 जून रोजी सकाळी अकरा वाजता जिल्हाभरातील ठराव धारक महासैनिक दरबार हॉल येथे एकत्रित येतील. या ठिकाणाहून शक्ती प्रदर्शनाने सहाय्यक निबंधक ठाकरे यांच्याकडे ठराव दाखल केले जातील. ज्या संस्था प्रतिनिधींनी यापूर्वीच आपले ठराव सहाय्यक निबंधक कार्यालयात सादर केले आहेत त्यांनीही या मेळाव्याला उपस्थित राहावे असे आवाहन आमदार अमल महाडिक यांनी केले आहे.