no images were found
चारित्र्याच्या संशयावरून बापट कॅम्प येथे पतीचा पत्नीवर जीवघेणा हल्ला
कोल्हापूर : चारित्र्याच्या संशयावरून कोल्हापुरातील बापट कॅम्प परिसरात पतीनं पत्नीच्या डोक्यात लोखंडी रॉड घालून तिला गंभीररीत्या जखमी केल्याची घटना घडलीय . जखमी राधिका गवळी हिला उपचारासाठी सीपीआरमध्ये दाखल करण्यात आले असून पोलिसानी संशयित पती सागर गवळी याला ताब्यात घेतले आहे. याप्रकरणी शाहूपुरी पोलिसात गुन्हा दाखल करण्यात आला आहे.
सागर गवळी याचा राधिका हिच्याशी 10 वर्षांपूर्वी प्रेम विवाह झाला असून ते बापट कॅम्प परिसरात राहतात. त्यांना दोन अपत्य आहेत. गेल्या काही वर्षापासून राधिका हिच्याबरोबर चारित्र्याच्या संशयावरून सागर याचा वारंवार वाद होत होता. अनेकदा हा वाद त्यांच्या नातेवाईकांनी मिटवला होता. शुक्रवारी सकाळी याच कारणावरून दोघा पती पत्नीमध्ये जोरदार वाद झाला. यावेळी सागर गवळी याने रागाच्या भरात पत्नी राधिका हिच्या डोक्यात लोखंडी रॉड घालून तिला गंभीर जखमी केलं. गंभीररीत्या जखमी झालेल्या राधिका हिला आजूबाजूच्या लोकांनी रुग्णवाहिकेतून उपचारासाठी सीपीआरमध्ये दाखल केले. दरम्यान या घटनेची माहिती मिळताच पोलिसांनी घटनास्थळी जावून संशयित पती सागर गवळी याला ताब्यात घेतलं असून या प्रकरणी शाहूपुरी पोलिसात गुन्हा दाखल करण्यात आला आहे.
