शरद कोरणे मृत्यू प्रकरणी रविकिरण इंगवलेवर गुन्हा दाखल करण्याची कोराणे कुटुंबियांची यांची मागणी

शरद कोरणे मृत्यू प्रकरणी रविकिरण इंगवलेवर गुन्हा दाखल करण्याची कोराणे कुटुंबियांची यांची मागणी

व्हायरल ऑडिओ क्लिपमधील कबुलीची सखोल चौकशी करा; पोलीस अधीक्षकांकडे निवेदन

कोल्हापूर, : दिवंगत शरद कोराणे यांना कारागृहात असताना एचआयव्ही पॉझिटिव्हचे इंजेक्शन देऊन मारल्याची कथित कबुली रविकिरण इंगवले याने व्हायरल ऑडिओ क्लिपमध्ये दिल्याचा आरोप करत, या प्रकरणाची सखोल चौकशी करून संबंधितांवर कायदेशीर कारवाई करावी, अशी मागणी शरद कोराणे यांच्या पत्नी पूजा शरद कोराणे यांनी पोलीस अधीक्षक, कोल्हापूर यांच्याकडे निवेदनाद्वारे केली आहे.

पूजा कोराणे यांनी २७ सप्टेंबर २०२६ रोजी दिलेल्या निवेदनात पतीच्या मृत्यूबाबत गंभीर संशय व्यक्त केला आहे. त्यांच्या म्हणण्यानुसार, शरद कोराणे यांचा ११ जुलै २०२३ रोजी मृत्यू झाला. त्यापूर्वी त्यांच्यावर राजारामपुरी पोलीस ठाण्यात गुन्हा क्रमांक १३६/२०१९ अन्वये मोक्का कायद्यांतर्गत गुन्हा दाखल झाला होता. २२ मे २०१९ रोजी अटक झाल्यानंतर ते कारागृहात गेले होते. कारागृहात असताना त्यांची प्रकृती वारंवार बिघडू लागली. त्यांना मधुमेहाचा त्रास झाला तसेच पायाच्या अंगठ्याला गँगरीन झाल्याने तो काढावा लागला. त्यांच्यावर कोल्हापुरातील डायमंड हॉस्पिटलमध्ये अनेक महिने उपचार सुरू होते. मात्र, प्रकृतीत सुधारणा न होता ११ जुलै २०२३ रोजी त्यांचे निधन झाले, असे निवेदनात नमूद केले आहे.

पूजा कोराणे यांच्या तक्रारीनुसार, ६ सप्टेंबर २०२६ रोजी सोशल मीडियावर एक ऑडिओ क्लिप व्हायरल झाली. या क्लिपमध्ये बोलणारी व्यक्ती शरद कोराणे यांना एचआयव्हीचे इंजेक्शन देण्यास आपण सांगितल्याचे आणि त्यांना त्याद्वारे मारल्याचे कथित विधान करत असल्याचा आरोप त्यांनी केला आहे. क्लिपमधील आवाज रविकिरण इंगवले यांचाच असल्याची आपली खात्री असल्याचेही त्यांनी निवेदनात म्हटले आहे.

कोराणे कुटुंब आणि रविकिरण इंगवले यांच्यात गेल्या २५ ते ३० वर्षांपासून राजकीय तसेच वैयक्तिक वैर असल्याचा दावाही पूजा कोराणे यांनी केला आहे. या पार्श्वभूमीवर व्हायरल ऑडिओ क्लिपमधील कथित विधान गांभीर्याने घेऊन त्याची सत्यता तपासणे आवश्यक असल्याचे त्यांनी नमूद केले आहे.

*कथित कटकारस्थानाचा तपास करण्याची मागणी*

शरद कोराणे यांना कथितरीत्या एचआयव्हीचे इंजेक्शन कोणी दिले, त्यासाठी कोणाला प्रवृत्त करण्यात आले होते का, या प्रकरणात अन्य व्यक्तींचा सहभाग होता का आणि कथित कटकारस्थानामागे कोण होते, याचा तपास करण्याची मागणी निवेदनातून करण्यात आली आहे. संबंधित ऑडिओ क्लिपची तांत्रिक व न्यायवैज्ञानिक तपासणी करावी, आवाजाची सत्यता पडताळावी, तसेच संबंधित व्यक्तींचे जबाब नोंदवून उपलब्ध पुराव्यांच्या आधारे पुढील कारवाई करावी, अशी मागणीही त्यांनी केली आहे.

पतीच्या मृत्यूमागील नेमके कारण स्पष्ट व्हावे आणि या प्रकरणातील सर्व बाबींची निष्पक्ष चौकशी व्हावी, अशी अपेक्षा पूजा कोराणे यांनी व्यक्त केली आहे. कथित ऑडिओ क्लिपमधील विधानांची सत्यता, त्यांचा मृत्यूशी असलेला संभाव्य संबंध आणि इतर व्यक्तींचा सहभाग तपासातून स्पष्ट होणे आवश्यक आहे.

दरम्यान, ऑडिओ क्लिपमधील कथित विधानांची स्वतंत्र पडताळणी झाल्याची किंवा या निवेदनावर पोलिसांनी गुन्हा दाखल केल्याची माहिती उपलब्ध नाही. त्यामुळे तक्रारीतील आरोप आणि त्यांची सत्यता तपासातून सिद्ध होणे या स्वतंत्र बाबी आहेत.

यावेळी शिवसेना जिल्हाप्रमुख सुजित चव्हाण, नगरसेविका अर्चना कोरणे, माजी नगरसेवक उत्तम कोराणे, हर्षल सुर्वे आदी उपस्थित होते.