औरंगाबाद हादरले ! ऐन दिवाळीत दोन खून

औरंगाबाद : काही दिवसांपूर्वीच गोदामातून लाखो रुपयांचा माल चोरी झाल्याच्या घटनेनंतर पुन्हा त्याच ठिकाणी चोरी करण्यासाठी गेलेल्या चौघांनी सुरक्षारक्षकाचा गळा आवळून खून केल्याचा प्रकार समोर आला. ही घटना बुधवारी मध्यरात्री दोन वाजतानंतर मोंढा नाका परिसरातील बालाजी इंटरप्राईजेस येथे घडली.
याप्रकरणी चौघा संशयितांविरोधात क्रांती चौक पोलिस ठाण्यात खुनाचा गुन्हा दाखल करण्यात आला. पाशा मुघल (वय ७२) असे मृत सुरक्षारक्षकाचे नाव आहे. तर दुसरी खुनाची घटना मिटमिटा परिसरात घडली आहे.
याप्रकरणी मृत पाशा यांचा मुलगा कैसर पाशा मुघल (३४, रा. मोंढा नाका) यांनी दिलेल्या फिर्यादीनुसार त्यांचे वडील पाशा हे मोंढा नाका भागातील बालाजी इंटरप्राईजेसच्या बिडी, सिगारेट गोदामात सुरक्षारक्षक म्हणून काम करीत होते. २६ ऑक्टोबरच्या रात्री दोन वाजतानंतर चौघे संशयित चोरीसाठी सदर गोदामात आले असता, मुघल यांनी चोरांना हटकले असावे, त्यामुळे चोरांनी पाशा मुघल यांचे हात पाय बांधले, त्यांच्या तोंडाला नाकाला मफलर आवळून खून केल्याचे फिर्यादीत म्हटले आहे.