no images were found
संजय राऊतांची दिवाळी जेलमध्येच, न्यायालयीन कोठडीत वाढ
मुंबई : पत्राचाळ गैरव्यवहार प्रकरणात न्यायालयीन कोठडीत असलेले शिवसेना खासदार संजय राऊत यांच्या जामीन अर्जावर आता २ नोव्हेंबरला सुनावणी होणार आहे. त्यामुळे संजय राऊत यांची दिवाळी तुरुंगातच जाणार असल्याचं स्पष्ट झालंय. पर्यायाने त्यांच्या न्यायालयीन कोठडीतील मुक्काम आणखी १५ दिवसांनी वाढला आहे.
आज झालेल्या सुनावणीत ईडीच्या वकिलांनी आपल्याला आणखी युक्तिवाद करायचा आहे, असं कोर्टाला सांगितलं. त्याची नोंद घेत कोर्टाने २ नोव्हेंबरपर्यंत सुनावणी स्थगित केली आहे. कारण पुढचा आठवडा दिवाळीमुळे कोर्टाचं नियमित कामकाज बंद असेल. संजय राऊत यांना पत्राचाळ गैरव्यवहार प्रकरणात ३१ जुलै रोजी अटक करण्यात आली. त्यानंतर पोलिस कोठडी आणि नंतर त्यांची रवानगी न्यायालयीन कोठडीत झाली. सुरुवातीपासूनच राऊतांचा या घोटाळ्याशी कसलाही संबंध नाही, असा युक्तिवाद त्यांच्या वकिलांनी केलाय. तर राऊत हेच या घोटाळ्याचे मुख्य सूत्रधार कसे आहेत, हे ईडीचे वकिल कोर्टाला पटवून देत आहेत.
दरम्यान, ७ सप्टेंबर रोजी राऊतांनी विशेष पीएमएलए कोर्टात जामीनासाठी अर्ज केला. मात्र तेव्हापासून कोर्टाची तारीख पे तारीख सुरु आहे. राऊतांना दिलासा मिळताना दिसत नाहीये. राऊतांच्या जामीन अर्जावर ११ ऑक्टोबरला सुनावणी झाली होती. मात्र, वेळेअभावी त्यांचा युक्तिवाद पूर्णपण होऊ शकला नव्हता. त्यामुळं सुनावणी 17 ऑक्टोबरला घेण्याचे सांगितले होते. मात्र, पुन्हा एक दिवसाने सुनावणी पुढे ढकलत १८ ऑक्टोबरला घेण्याचा निर्णय घेतला होता. ती ही सुनावणी पूर्ण होऊ शकलेली नव्हती. आज पुन्हा सुनावणी झाली. पण ईडीच्या वकिलांच्या युक्तिवादाची नोंद घेत न्यायालयाने राऊतांच्या जामीन अर्जावर २ नोव्हेंबरला सुनावणी घेणार असल्याचं स्पष्ट केलं.
