तमाशाच्या फडात नाचलेला पोलीस निलंबित

तमाशाच्या फडात नाचलेला पोलीस निलंबित
जळगाव : जिल्ह्यातील खेडी या गावात तमाशाचा कार्यक्रमात चक्क एका पोलिसाने नृत्य केल्याचा व्हिडिओ व्हायरल झाला आहे. काही दिवसापूर्वी तमाशाचा कार्यक्रम झाला होता. यात्रा कार्यक्रमात एक सहाय्यक फौजदार चक्क नृत्य करताना तसेच पैसे ओवाळताना दिसून आला होता. या प्रकाराचा व्हिडिओ सोशल मीडियावर चांगलाच व्हायरल झाला आहे. व्हिडिओ व्हायरल झाल्यानंतर जिल्हा पोलीस अधीक्षक डॉ. प्रवीण मुंढे यांनी या पोलीस कर्मचाऱ्यावर निलंबनाची कारवाई केली आहे.
सहाय्यक फौजदार भटू विरभान नेरकर असे तमाशाच्या कार्यक्रमात नृत्य करणाऱ्या पोलीस कर्मचाऱ्यांचे नाव आहे तसेच स्थानिक गुन्हे शाखेचे तत्कालीन प्रमुख किरणकुमार बकाले हे मराठा मराठा समाजाबद्दल आक्षेपार्ह वक्तव्य करतानाची क्लिप व्हायरल झाली होती. त्यानंतर आता तमाशाच्या फडात पोलीस कर्मचाऱ्याच्या या नृत्य केल्याच्या प्रकाराने जिल्हा पोलीस दलाची चांगलीच नाचक्की होत असल्याचे पाहायला मिळत आहे.
बकाले यांच्यामुळे जिल्हा पोलीस दलाची प्रतिमा खालावली असतांना पुन्हा एका सहायक फौजदाराला निलंबित करण्यात आले आहे. त्यांच्या पाठोपाठ आता जिल्हा पोलीस अधिक्षक डॉ. प्रवीण मुंडे यांनी भटू विरभान नेरकर या सहायक फौजदाराला निलंबित केले आहे.
गेल्या महिन्यात निवृत्तीनगरात झालेल्या भावेश पाटील या तरुणाच्या हत्येने जळगाव हादरले होते. या प्रकरणी खेडी खुर्द येथील भूषण रघुनाथ सपकाळे आणि आव्हाणे येथील मनीष नरेंद्र पाटील या दोन आरोपींना अटक करण्यात आली आहे. यातील संशयित भूषण सपकाळे याच्या गावातील तमाशात सहाय्यक फौजदार भटू नेरकर हा आपल्या एका सहकार्या्सह नाचला होता.