no images were found
लम्पी चर्मरोगाने जिल्ह्यात 7 जनावरे दगावली
कोल्हापूर : जिल्ह्यात जनावरांना होणारा लम्पी चर्मरोग विस्तारताना दिसत आहे. शनिवारी लम्पी आजाराने 7 जनावरांचा मृत्यू झाला तर लम्पी चर्मरोग बाधित जनावरांची संख्या 65 वर गेली आहे. 22 जनावरे बरी झाल्याची दिलासादायक बाब असून 36 जनावरांना अलगीकरणात ठेवण्यात आले होते. मृत जनावरांत 5 गायी आणि 2 बैलाचा समावेश आहे.
मोटखे-पाटील रा. जांभळी (ता. शिरोळ) यांनी गोठ्यातील 40 गाईंना लम्पी स्किन आजार झाला असून त्यातील 4 दुभत्या गाई दगावल्याचा दावा केला आहे. जांभळी-नांदणी रोडवर 400 हून अधिक गायी असणाऱ्या गोठ्यात तब्बल 30 गायींना लम्पीची लागण झाली होती. या गायींवर खासगी पशुवैद्यकियांकडून उपचार सुरू आहेत. तरीही काही गायींचा मृत्यू झाला आहे. आजर्यंत २ गाभण गायी अशा एकूण चार गायींचा लम्पी आजाराने मृत्यू झाला आहे. सध्या 9 गायी बऱ्या झाल्या असून उर्वरित 19 गायींवर सध्या उपचार चालू आहेत. अन्य बाधित गायींची प्रकृती चिंताजनक आहे त्यांच्यावर देखील उपचार चालू आहेत.
याबाबत पशुसंवर्धनचे जिल्हा उपायुक्त डॉ. वाय. ए. पठाण यांनी सांगितले की, तालुका पशुवैद्यकीय अधिकार्‍यांनी संबंधित गोठा मालकांना माहिती विचारली असता त्यांनी ती दिली नाही. याबाबत माहिती घेण्यात येईल. मृत जनावरांचे तातडीने अहवाल देण्यासाठी संबंधित अधिकार्‍यांना सूचना देण्यात आल्या आहेत. अहवाल आल्यानंतर पशुपालकांना भरपाई देण्यात येणार असल्याचे पशुसंवर्धनचे जिल्हा उपायुक्त डॉ. वाय. ए. पठाण यांनी सांगितले आहे.
यासंदर्भात पशुसंवर्धन मंत्री व सचिवांनी जिल्ह्यातील बाधित जनावरांचा व्हीसीद्वारे आढावा घेतला. दरम्यान अधिकार्‍यांनी गोठ्यापर्यंत जाऊन शासनाच्या वतीने उपलब्ध औषधे, लस यांची तातडीने अंमलबजावणी करण्याच्या सूचना देण्यात आल्या.
जिल्हा परिषद पशुसंवर्धन विभागाकडून लसीकरणासह अन्य उपाययोजना सुरू असूनही बाधित आणि मृत्यूचा दररोजचा वाढता आकडा पाहता प्रशासन अधिक चिंतीत आहे. जिल्ह्यातील हातकणंगले, शिरोळ तालुक्यात लम्पीबाधित जनावरे अधिकप्रमाणात आहेत. तालुक्यातील जांभळी गाव हॉटस्पॉट बनले असून, बाधित जनावरांची संख्या वाढत आहे.
