मुकेश अंबानी श्रीमंतांच्या यादीत पुन्हा टाॅपवर!

मुंबई : रिलायन्स इंडस्ट्रीजचे अध्यक्ष आणि व्यवस्थापकीय संचालक मुकेश अंबानी यांनी फोर्ब्स 2023 च्या भारतातील 100 श्रीमंत व्यक्तींच्या यादीत पुन्हा पहिले स्थान मिळवले आहे. त्यांची एकूण संपत्ती 92 अब्ज डॉलर्स आहे. जिओ फायनान्शिअलला आरआयएलमधून वेगळे केल्यानंतर आणि लिस्टिंग झाल्यानंतर लगेचच अंबानी यांनी त्यांची उत्तराधिकार योजना मजबूत करण्याची घोषणा केली. त्यांनी आपल्या तिन्ही मुलांना ऑगस्टमध्ये रिलायन्सच्या संचालक मंडळावर नियुक्त केले.
यादीत अदानी दुसऱ्या क्रमांकावर
गौतम अदानी 2022 मध्ये भारतातील सर्वात श्रीमंत व्यक्ती होते. पण, फेब्रुवारीमध्ये अमेरिकन शॉर्ट-सेलिंग कंपनी हिंडनबर्ग रिसर्चच्या अहवालानंतर अदानी समूहाच्या कंपन्यांच्या शेअर्समध्ये मोठी घसरण झाली. यामुळे अदानी श्रीमंत भारतीयांच्या यादीत पहिल्या स्थानावरून खाली आले. मात्र, अदानी समूहाच्या कंपन्यांच्या शेअरच्या किमतीत लक्षणीय सुधारणा झाली आहे. असे असूनही गौतम अदानी यांची एकूण संपत्ती (कुटुंबासह) 68 अब्ज डॉलरपर्यंत घसरली आहे.
डॉलर्स आणि टक्केवारीच्या दृष्टीने गौतम अदानी यांच्या एकूण संपत्तीतील ही सर्वात मोठी घसरण आहे. आता ते फोर्ब्सच्या 100 श्रीमंत भारतीयांच्या यादीत दुसऱ्या क्रमांकावर आले आहेत. भारतातील सर्वात श्रीमंत 100 लोकांची एकूण संपत्ती 2023 मध्ये 799 अब्ज डाॅलर आहे. या यादीत एचसीएल टेकचे संस्थापक शिव नाडर तिसऱ्या क्रमांकावर आहेत. त्यांची संपत्ती 29.3 अब्ज डाॅलर आहे. गेल्या एका वर्षात एचसीएल टेक शेअर्स 42 टक्क्यांनी वाढले आहेत. त्यामुळे नाडर यांच्या संपत्तीत वाढ झाली आहे. या यादीत सावित्री जिंदाल चौथ्या क्रमांकावर आहेत. त्या जिंदाल ग्रुपच्या प्रमुख आहेत. त्यांची एकूण संपत्ती 24 अब्ज डॉलर आहे. या यादीत राधाकिशन दमानी यांचे नाव पाचव्या क्रमांकावर आहे. त्यांची एकूण संपत्ती 23 अब्ज डॉलर आहे. गेल्या वर्षीच्या 27 अब्ज डॉलरच्या तुलनेत संपत्ती खूपच कमी आहे.
या यादीत तिघांनी स्थान मिळवले
फोर्ब्स आशियाच्या इंडिया एडिटर नाजनीन करमाली यांनी सांगितले की, भारत झपाट्याने विकसित होत आहे आणि जागतिक गुंतवणूकदारांसाठी एक हॉट स्पॉट बनला आहे. यामुळे यंदाचा 100 श्रीमंत भारतीयांचा क्लब अगदी खास बनला आहे. या क्लबमध्ये सामील होण्यासाठी किमान 2.3 अब्ज डाॅलर निव्वळ संपत्ती आवश्यक आहे. यावर्षी या यादीत तीन नवीन लोक सामील झाले आहेत. यामध्ये रेणुका जगतियानी, दाणी कुटुंब आणि केपी रामास्वामी यांचा समावेश आहे.