अंबाबाईची सिंहासनरुढ रुपातील अलंकार पूजा     

अंबाबाईची सिंहासनरुढ रुपातील अलंकार पूजा      कोल्हापूर. ( प्रतिनिधी ) : नवरात्र उत्सवाच्या पहिल्या दिवशी करवीर निवासिनी अंबाबाईची सिंहासनरुढ रुपातील अलंकार पूजा बांधण्यात आली. हजारो भाविकांनी देवीचे दर्शन घेतले दर्शन घेण्यासाठी मोठ्या रांगा लागल्या होत्या.
करवीर निवासिनी अंबाबाई ही सर्वस्याद्या, म्हणजेच आदिशक्ती असून नवरात्रातील अश्विन प्रतिपदेस तिची सिंहासनारुढ रुपात पूजा बांधली जाते. सिंहासनामध्ये सिंहाचा मुखवटा, पाय यांच्या आकाराचा अंतर्भाव असतो. कारण सिंह हे शौर्य, सामर्थ्य, वैभव, ऐश्वर्य आणि सत्ता ह्यांचे प्रतीक आहे. सिंहासनावर विराजमान होणारे देव व राजे हे सार्वभौमत्व दर्शवितात. अंबाबाई ही विश्वाची सार्वभौम सत्ताधीश आहे. अशी श्रद्धा असल्यामुळेच सिंहासनारूढ पूजा बांधण्‍यात आली होती. पूजेमध्ये श्री महालक्ष्मी राजराजेश्वरी या स्वरुपात भक्तांना मनोवांच्छित फल प्रदान करण्यासाठी सिंहासनावर विराजमान आहे. अत्यंत वैभवशाली व प्रसन्न असे हे देवीचे रुप द्विभुज आहे. उजव्या हाताने आशीर्वाद व अभय देत आहे. डाव्या हातात कमळ आहे. कमळ हे सौंदर्य, ज्ञान आणि प्रतीक आहे. ही पूजा श्रीपूजक आनंद मुनीश्वर, किरण मुनीश्वर, मयूर मुनीश्वर, निवास जोशी, सचिन गोटखिंडीकर यांनी बांधली होती.