no images were found
वैकुंठ स्मशानभूमीत जळत्या चितेजवळ जादूटोणा करणाऱ्या दोन तृतीयपंथीयांना अटक
पुणे : विध्येचे माहेरघर म्हणून प्रसिद्ध असलेल्या पुण्यातील वैकुंठ स्मशानभूमीत एक धक्कादायक घटना समोर आली आहे. वैकुंठ स्मशानभूमीत शनीवारी पाहटे अडीचच्या सुमारास चितेजवळ जादूटोणा करताना दोन तृतीयपंथीयांना अटक करण्यात आली आहे. या धक्कादायक घटनेमुळे पुण्यात एकच खळबळ उडाली आहे.
लक्ष्मी निबाजी शिंदे (वय ३१ रा. मुंबई) आणि मनोज अशोक धुमाळ (वय २२ रा.कोथरूड पुणे) अशी अटक करण्यात आलेल्या दोन तृतीयपंथींय आरोपींची नावे आहेत. पोलिसांनी दिलेल्या माहितीनुसार, शुक्रवारी मद्यरात्री १ वाजण्याच्या सुमारास वैकुंठ स्मशानभूमीत एका मृतदेहावर अंत्यसंस्कार करण्यात आले. त्यानंतर काही तासाने लक्ष्मी शिंदे आणि मनोज धुमाळ हे दोन तृतीयपंथींय चितेजवळ आले. त्यानंतर दोघांनी त्यांच्यासोबत आणलेल्या काळ्या रंगाच्या बाहुल्या, काही लोकांचे फोटो, लिंबू, सुया आणि हळदी कुंकू हे साहित्य घेऊन जादूटोण्याप्रमाणे कृत्य करण्यास सुरवात केली. नेमकं याचवेळी हे दृश्य स्मशानभूमीमधील एका कर्मचाऱ्याच्या निदर्शनास पडले. त्याने काही अंतरावर जाऊन पाहिलं असता आरोपी जादूटोण्यासारखं काही तरी करत असल्याचे त्याला दिसून आले.
या बाबत पोलिसांना माहिती मिळताच त्यांनी दोघांना रंगेहात पकडले. आरोपींजवळ काही व्यक्तीचे फोटो जळालेल्या अवस्थेत आढळून आले आहेत. त्यामुळे हे दोघे कोणावर जादूटोणा करत होते, याची चौकशी पोलीस करत आहेत. तसेच या प्रकरणी दोन्ही आरोपींविरोधात नरबळी व इतर अमानुष अघोरी, दुष्कर्मी प्रथा आणि काळा जादू अधिनियम २०१३ कलम ३ अन्वये गुन्हा दाखल करण्यात करण्यात आला आहे. पुण्यात अंधश्रद्धा निर्मूलनासाठी अंनिसच्या साथींचं मोठं काम असताना देखील अघोरी कृत्य आणि जादूटोण्यासारखे प्रकार थांबताना काही दिसत नाहीत.
