राजीव गांधींच्या हत्येतील ६ दोषींची तुरुंगातून सुटका

नवी दिल्ली : देशाचे दिवंगत माजी पंतप्रधान राजीव गांधी यांच्या हत्येतील ६ दोषींची तुरुंगातून सुटका करण्यात आली आहे. दोषी नलिनी श्रीहरन आणि पी. रविचंद्रन यांचाही सुटका करण्यात आलेल्यांमध्ये समावेश आहे. सर्वोच्च न्यायालयाचे न्यायमूर्ती बी. आर. गवई यांच्या खंडपीठाने त्यांचे वर्तन समाधानकारक असल्याचे लक्षात घेऊन मुदतपूर्व सुटकेची मागणी करणाऱ्या त्यांच्या अर्जाला परवानगी दिली आहे.
दरम्यान, मे महिन्यात मद्रास हायकोर्टाने यांच्या सुटकेची याचिका फेटाळून लावली होती. मद्रास उच्च न्यायालयाने त्यांची याचिका फेटाळून लावताना असे म्हटले होते की, त्यांना घटनेच्या कलम 142 अंतर्गत विशेष अधिकार नाहीत. आणि त्यामुळे सर्वोच्च न्यायालयाने पेरारिवलनसाठी मे 2022 मध्ये दिलेल्या आदेशानुसार त्यांना सोडण्याचे आदेश देऊ शकत नाही. याआधी आणखी एक सह-दोषी पी रविचंद्रन यांनीही दिलासा मिळावा म्हणून सर्वोच्च न्यायालयात धाव घेतली होती. 30 वर्षांपासून तुरुंगात असलेल्या रविचंद्रन यांनी औपचारिक सुटकेच्या प्रकरणाचा निकाल लागेपर्यंत अंतरिम जामीन मागितला. पेरारिवलनच्या सुटकेवर त्यांची याचिका आधारित असल्यास ते सर्वोच्च न्यायालयात जाऊ शकतात, असे उच्च न्यायालयाने म्हटले होते.
मे 2018 मध्ये, तामिळनाडू सरकारने केलेल्या शिफारशीच्या आधारे तुरुंगातून अकाली सुटकेसाठी पेरारिवलनच्या याचिकेवर निर्णय घेताना, सर्वोच्च न्यायालयाने कलम 142 चा वापर करून त्यांची सुटका करण्याचे आदेश दिले होते. तुरुंगात चांगली वागणूक मिळाल्याने न्यायालयाने त्यांची सुटका करण्याचे आदेश दिले होते.
राजीव गांधी यांची 21 मे 1991 च्या रात्री तामिळनाडूच्या श्रीपेरंबदुर येथे एका महिला आत्मघाती बॉम्बरने हत्या केली होती. धनू असे हल्लेखोराचे नाव आहे. दरम्यान, मे 1999 मध्ये सर्वोच्च न्यायालयाने पेरारिवलन, मुरुगन, संथन आणि नलिनी या चार दोषींना सुनावण्यात आलेली फाशीची शिक्षा कायम ठेवली होती. तथापि, 2014 मध्ये, दयेच्या अर्जावर निर्णय घेण्यास विलंब झाल्याच्या कारणास्तव संथन आणि मुरुगनसह पेरारिवलनची फाशीची शिक्षा जन्मठेपेत बदलली. नलिनी यांना मुलगी असल्याच्या कारणावरून 2001 मध्ये फाशीची शिक्षा जन्मठेपेत बदलण्यात आली होती.