शाही दसरा फेस्टिवल स्ट्रीटमधून चार लाख पंच्याहत्तर हजाराचे बचत गटांची उलाढाल

शाही दसरा फेस्टिवल स्ट्रीटमधून चार लाख पंच्याहत्तर हजाराचे बचत गटांची उलाढाल

कोल्हापूर : महापालिकेच्यावतीने आयोजित केलेल्या शाही दसरा फेस्टीवल स्ट्रीटमधून शहरातील व ग्रामीण भागातील 130 बचत गटांच्या स्टॉलमधून 4,75,527/-रुपये उत्पन्न झाले आहे. यामध्ये दि.4 ऑक्टोंबर 2022 रोजी रु.39,430/- व दि.05 ऑक्टोंबर 2022 रोजी रु.1,42,400/-  शहरातील बचत गटांचे उत्पन्न झाले आहे. तरी ग्रामीण भागातील बचत गटांचे दि.4 ऑक्टोंबर 2022 रोजी रु.1,81,307/- व दि.05 ऑक्टोंबर 2022 रोजी रु.2,12,290/- उत्पन्न झाले आहे. यामध्ये शहरातील बचत गटांनी 54 व ग्रामीण भागातील 67 बचत गटांनी प्रामुख्याने सेंद्रीय हळद, शेवगा, आयुर्वेदिक उत्पादने, कोल्हापूरी मसाले, कापडी पिशव्या, फनि गेम्स, काजूगर, विविध प्रकारची बिस्कीटे, चटणी, थाली पीठ, लस्सी, ज्युस, वडापाव, लोणी डोसा, पापड लोणचे, व्हेज पुलाव, बिर्याणी असे विविध पदार्थ्यांचे स्टॉल लावले होते.

            याचबरोबर न्यू पॅलेसमधून दस-या चौकाकडील मार्गावर माध्यमिक शाळेतील मुलांचे लेझीम, झांजपथके, रांगोळी, लाठीकाठी, शाहिर पोवाडा, धनगरी ढोल, मनोरंजनाचे कार्यक्रमही घेण्यात आले. दसरा चौक येथे मोठया प्रमाणात गर्दी होत असल्याने दिव्यांगांना, लहान मुलांना व जेष्ठ नागरीकांना जवळून शाही दसरा पाहत येत नाही. त्यामुळे दसरा मिरवणूक मार्गावर दोन्ही बाजूस त्यांना उभे राहून शाही परिवाराला शुभेच्छा देता आल्या. त्याचबरोबर एनसीसी, आरएसपीचे विद्यार्थ्यांनी या शाही परिवाराव पुष्पवृष्टी केली.

महापालिकेचे चोख नियोजन

            शाही दसरा महोत्सवासाठी जिल्हाधिकारी यांनी दिलेल्या आदेशानुसार महापालिकेच्या अधिका-यांनी व कर्मचा-यांनी चोख नियोजन करुन हा महोत्सव पार पाडला. महापालिकेच्यावतीने न्यू पॅलेस ते सी.पी.आर. चौक मार्गावर रस्त्याच्या दोन्ही बाजूस मार्किंग करण्यात आले होते. त्याचबरोबर या रस्त्याचे डांबरी करणही करण्यात आले होते. महापालिेने या महोत्सवाच्या ठिकाणी लाईटची व्यवस्था, 1 वैद्यकीय पथक, अग्निशमन गाडी, पिण्याचा पाण्याचा 6 टँकर व तीन दिवस स्वच्छता कर्मचाऱ्यांची व्यवस्था, मंडपची व्यवस्था केली होती. त्याचबरोबर महापालिका मुख्य इमारत व शहरातील मुख्य पुतळयांभोवती विद्युत रोषणाई करण्यात आली होती. हे सर्व नियोजन प्रशासक डॉ.कादंबरी बलकवडे यांच्या मार्गदर्शनाखाली उप-आयुक्त रविकांत आडसूळ, शिल्पा दरेकर, सहा.आयुक्त विनायक औधकर, सहाय्यक संचालक नगररचना रामचंद्र महाजन, अतिरिक्त परिवहन व्यवस्थापक टिना गवळी, शहर अभियंता नेत्रदिप सरनोबत, जल अभियंता हर्षजीत घाटगे, उपशहर अभियंता नारायण भोसले, मुख्य आरोग्य निरिक्षक जयवंत पवार, करनिर्धारक व संग्राहक सुधाकर चल्लावाड, पशुवैद्यकि अधिकारी डॉ.विजय पाटील, इस्टेट ऑफिसर सचिन जाधव, मुख्य अग्निशमन अधिकारी तानाजी कवाळे यांनी केले.