बाबा सिद्दीकींच्या पक्षप्रवेशावर अजित पवारांचे सूचक विधान

काँग्रेसचे ज्येष्ठ नेते बाबा सिद्दीकी यांनी काँग्रेस पक्षाला सोडचिठ्ठी दिल्यानंतर ते अजित पवार गटात प्रवेश करणार असे म्हटले जात होते. त्यावर आता उपमुख्यंमत्री अजित पवार यांनीच थेट भाष्य केले आहे. उद्या दि. १० फेब्रुवारी रोजी सायंकाळी त्यांचा पक्षप्रवेश होईल, असे अजित पवार म्हणाले आहेत. बाबा सिद्दीकी यांच्याशिवाय ११ फेब्रुवारी रोजीही काही नेते पक्षात प्रवेश घेणार आहेत. निवडणूक आयोगाच्या निर्णयानंतर पक्ष, चिन्ह, झेंडा आमच्याकडे आला आहे. त्यामुळे इतर नेत्यांनीही याचा विचार करावा, असा सूचक इशारा अजित पवार यांनी दिला. पूण्यामध्ये पत्रकारांशी संवाद साधत असताना त्यांनी हे विधान केले.
खासदार अमोल कोल्हे यांनी अजित पवार आणि शरद पवार अशा दोन्ही गटाला प्रतिज्ञापत्र सादर केले होते. माझी दिशाभूल करून प्रतिज्ञापत्र घेतले गेले, असे विधान अमोल कोल्हे यांनी केले होते. यावर प्रत्युत्तर देताना अजित पवार म्हणाले की, ते स्वतः शपथविधीला उपस्थित होते. तिथे त्यांनी माध्यमांना बाईटही दिले होते. त्यानंतर त्यांची भूमिका अचानक बदलली, त्याबद्दल आता आम्हाला बोलायचे नाही. पण आमदार – खासदार यांची दिशाभूल करून असे प्रतिज्ञापत्र घेता येत नाही.