शिवसेनाप्रमुख वंदनीय बाळासाहेब ठाकरे यांच्या पुण्यतिथी निमित्त शिवसेनेच्यावतीने अभिवादन

कोल्हापूर ( प्रतिनीधी ) : समस्त हिंदुस्थानातील हिंदू जणांचे श्रद्धास्थान, मराठी मनात, मनगटात अस्मितेची, अभिमानाची, स्वाभिमानाची मशाल चेतवणारे, मराठी मनाचे मानबिंदू हिंदुहृद्यसम्राट शिवसेनाप्रमुख वंदनीय बाळासाहेब ठाकरे यांचा आज १७ नोव्हेंबर रोजी स्मृतिदिन आहे. अखंड महाराष्ट्राचा श्वास आणि ध्यास असणाऱ्या आपल्या लाडक्या साहेबांना आज शिवसेना जिल्हा व शहर कार्यकारणीच्या वतीने अभिवादन करण्यात आले. साहेबांनी मराठी मनगटात दिलेली ताकत आणि अन्यायविरोधात लढण्याची विचारांची ज्योत अशीच तेवत ठेवण्याची शपत घेतली.

आज छत्रपती शिवाजी महाराज चौक येथे हिंदुहृद्यसम्राट शिवसेनाप्रमुख वंदनीय बाळासाहेब ठाकरे यांच्या प्रतिमेचे पूजन करून साहेबांच्या प्रतिमेस पुष्पहार अर्पण करण्यात आला. यावेळी “जय भवानी, जय शिवाजी”, “शिवसेना जिंदाबाद”, “परत या, परत या.. बाळासाहेब परत या”, “अमर रहे.. अमर रहे.. बाळासाहेब अमर रहे” अशा घोषणांनी परिसर दणाणून सोडला.

यावेळी बोलताना शिवसेना जिल्हाप्रमुख सुजित चव्हाण यांनी, शिवसेनाप्रमुख म्हणजे महाराष्ट्रातल्याच नव्हे तर देशातील राजकारणातील धगधगते अग्निकुंड. या शिवतेजाने तब्बल पाच दशके मराठी माणसाच्या मनात अस्मितेची मशाल चेतवत ठेवली. आपल्या कुंचल्याच्या फटकाऱ्याने, लेखणीतील अंगाराने, अंगी असलेल्या कणखर नेतृत्वाने आणि रोखठोक ठाकरी शैलीने महाराष्ट्रातच नव्हे तर हिंदुस्थानात आपला एक वेगळा दबदबा निर्माण करून शिवसैनिकांचे श्रद्धास्थान बनलेले व्यंगचित्रकार, पत्रकार, हिंदुहृद्यसम्राट शिवसेनाप्रमुख वंदनीय बाळासाहेब ठाकरे यांनी देशाच्या इतिहासात एक वेगळा ठसा उमटविला.