सुकेश चंद्रशेखरचे अयोध्या राम मंदिरासाठी ११ किलो सोन्याचा मुकूट दान करण्याची इच्छा

नवी दिल्ली : फसवणुकीच्या आरोपाखाली दिल्लीतील मंडोलीच्या तुरुंगात असलेल्या सुकेश चंद्रशेखरने अयोध्या मंदिरातील श्रीरामांच्या मूर्तीसाठी सोन्याचा मुकुट दान करण्यासाठी  त्याने त्याच्या वकीलांमार्फत श्री रामजन्मभूमी तीर्थ क्षेत्र ट्रस्टच्या प्रमुखांना दोन पानी पत्र लिहून परवानगी मागितली आहे.

त्या मुकुटाचं वजन ११ किलो असून तो ९१६.२४ कॅरेट सोन्याचा आहे. त्याशिवाय मुकुटात १०१ हिरे आहेत. प्रत्येक हिऱ्याचं वजन ५ कॅरेट आहे. मुकुटाच्या मध्यभागी एक पाचू हिरा असून तो ५० कॅरेटचा आहे. श्रीरामांच्या मूर्तीसाठी हा मुकुट दक्षिण भारतातील एका प्रसिद्ध कारागिराने तयार केला आहे.

पत्रात सुकेश चंद्रशेखरने असंही लिहिलंय, की त्याची आणि त्याच्या कुटुंबीयांची प्रभू श्री रामांप्रती असलेल्या भक्तीमुळे त्यांना ही भव्य भेट देण्याची प्रेरणा मिळाली आहे. मुकुट दान करणं हे त्यांच्यासाठी एक स्वप्न असून हा आशीर्वाद असल्याचं ते मानतात. आयुष्यातील प्रत्येक गोष्ट श्रीरामाच्या आशीर्वादाचा परिणाम असल्याचं त्याने लिहिलं आहे.

 सुकेश चंद्रशेखरने त्याच्या स्टाफला आणि त्याचे कायदेशीर सल्लागार अनंत मलिक यांना अधिकृत केलं आहे, जे ट्रस्टला मुकुट भेट देतील. मुकुटासंबंधी बिलं, पावत्या आणि इतर सर्व कायदेशीर औपचारिकता पूर्ण झाल्याची ते खात्री करतील. श्रीरामांसाठी तयार करण्यात आलेला सोन्याचा मुकुट डिसेंबरच्या पहिल्या आठवड्यात पूर्ण होण्याची अपेक्षा आहे.