घाटात वळणावर  तोल गेल्याने डांबरी रस्त्यावर डोके आपटून महिला ठार

कसबा बावडा : धावत्या दुचाकीवर पाठीमागे बसून तोंडावर स्कार्फ बांधण्याचा प्रयत्न करणारी महिला तोल जाऊन रस्त्यावर पडल्याने जागीच ठार झाली.ही दुर्दैवी घटना राधानगरी तालुक्यातील राशिवडे-चांदे दरम्यान घाटात वळणावर घडली.

कल्पना नारायण कुरणे (वय ४२, रा. कसबा बावडा, कोल्हापूर) असे त्यांचे नाव आहे. याबाबतची माहिती अशी कल्पना कुरणे यांच्या चांदे येथील पुतणीच्या घरी वास्तुशांती कार्यक्रम होता. त्या कार्यक्रमासाठी काल दुपारी नातेवाइकांसोबत दुचाकीवरून जात होत्या. त्याचवेळी घाटात वळणावर त्यांचा तोल गेल्याने काही कळण्यापूर्वीच त्या डांबरी रस्त्यावर कोसळल्या.

डांबरी रस्त्यावर त्यांचे डोके जोरात आपटल्याने गंभीर दुखापत झाली. रस्त्यावरून जाणाऱ्या वाहनधारकांनी त्यांना गंभीर जखमी अवस्थेत येथील प्राथमिक आरोग्य केंद्रात नेले. मात्र, उपचारापूर्वीच त्यांचा मृत्यू झाल्याचे डॉक्टरनी सांगितले. या मार्गावर राशिवडे व चांदे या दोन्हीकडील घाटांना तीव्र वळणे आहेत. परिसर अपघात प्रवण क्षेत्र आहे.

 कल्पना या कसबा बावडा येथे धुणी-भांडी तसेच घरकाम करून आपला उदरनिर्वाह चालवत होत्या. दहा वर्षांपूर्वी त्यांच्या पतीचे निधन झाले आहे. गेल्याच महिन्यात त्यांच्या लहान मुलीचे लग्न झाले. प्रतिकूल परिस्थितीवर मात करत त्यांनी घरही खरेदी केले होते. मृतदेह केळोशी येथे माहेरी अंत्यसंस्कारासाठी नेण्यात आला. त्यांच्या पश्चात दोन विवाहित मुली आणि मुलगा असा परिवार आहे.