no images were found
रायगडमध्ये सापडली शस्त्रास्त्रांच्या साठ्यासह बोट
रायगड : रायगड जिल्ह्यातील श्रीवर्धन येथे आज दुपारी एक संशयास्पद बोट आढळून आली. या बोटीत तीन एके-४७ सह तब्बल १० बॉक्स आढळून आले. याव्यतिरिक्त हरिहरेश्वर येथेही एक लहान बोट आढळून आली. या बोटीत लाईफजॅकेट तसेच इतर साहित्य सापडले. या बोटीत शस्त्रे आढळून आल्याने सर्वत्र खळबळ उडाली. या घटनेनंतर पोलिसांनी रायगड जिल्ह्यात हायअलर्ट जाहीर करण्यात आला. याबाबतची अपडेट समोर आली असता आढळून आलेली बोट ही एक ऑस्ट्रेलियन बोट असल्याची माहिती गृहमंत्री देवेंद्र फडणवीस यांनी विधीमंडळात दिली. या बोटीचे नाव लिडिहान असून तिची मालकी ऑस्ट्रेलियन नागरिक हाना लॉंडरर्स गन या महिलेची आहे. तिचे पती जेम्स हार्बट हे सदर बोटीचे कप्तान असून ही बोट मसकत येथून युरोपकडे जाणार होती.
26 जुलै रोजी सकाळी १० वाजेच्या सुमारास या बोटीचे इंजिन निकामी झाले आणि बोटीवर असलेल्या खलाशांनी मदतीसाठी कॉल दिला. दुपारी १ वाजेच्या सुमारास एका कोरियन युद्धनौकेने बोटीवरील खलाशांची सुटका केली आणि त्यांना ओमानला सुपूर्त केले. समुद्र खवळलेला असल्याने लेडीहान या बोटीचे टोईंग करता आले नाही. त्यानंतर समुद्राच्या अंतर्गत प्रवाहामुळे भरकट ही नौका रायगडच्या हरिहरेश्वरच्या किनाऱ्याला लागली. अशी माहिती भारतीय कोस्टगार्डकडून प्राप्त झाली. असं देवेंद्र फडणवीस यांनी सांगितलं आहे. दरम्यान या बोटीची ओळख पटली असली तरी, राज्यातील महत्वाच्या शहरात मात्र हाय अलर्ट जारी करण्यात आला आहे. गंभीर बाब म्हणजे बोटीत काही शस्त्रास्त्रांचा साठादेखील सापडला. समुद्रामार्गे दहशतवादी हल्ल्याचा कट असल्याची शक्यता पाहता, हा हाय अलर्ट जारी करण्यात आलाय. आज विधानसभेचं पावसाळी अधिवेशन सुरु असल्याने अधिवेशनातदेखील हा मुद्दा उपस्थित करण्यात आला.
या प्रकरणी मुख्यमंत्री एकनाथ शिंदे यांनीदेखील या प्रकरणी चौकशीचे आदेश दिले आहेत. मुंबईसह राज्यातील समुद्र किनाऱ्याच्या ठिकाणी कडेकोट सुरक्षा व्यवस्था करण्यात आली आहे.
