प्रियकरासोबत सारख पळून जाणाऱ्या मुलीचा ओढणीने गळा आवळून पित्याने केला खून

नाशिक : ओढणीने गळा आवळून बापाने मुलीचा जीव घेतल्याचा घेतल्याचा गुन्हा घडला आहे. ज्योती रामकिशोर भारती (वय २४ वर्ष) असे हत्या झालेल्या मुलीचे नाव आहे. नाशिकमध्ये अंबड परिसरातील एक्सलो पॉईंट येथे हा धक्कादायक प्रकार घडला आहे. प्रेमसंबंधांवरुन घरात होणाऱ्या वादातून मुलगी वारंवार घर सोडून निघून जात असल्याने बापाने तिची हत्या केल्याची प्राथमिक माहिती समोर आली आहे. आरोपी बाप रामकिशोर भारती याला पोलिसांनी ताब्यात घेतले आहे.
अंबड पोलीस ठाण्याच्या हद्दीत येणाऱ्या अंबड लिंक रोड येथील चुंचाळे परिसरात राहणाऱ्या रामकृष्ण नगर भागात रामकिशोर भारती (वय ४५ वर्ष) यांची मुलगी ज्योती हिचे काही दिवसांपासून एका मुलाशी प्रेम संबंध होते, मुलीचे हे प्रेम संबंध वडील रामकिशोर यांना मान्य नसल्याने त्यांच्यात या विषयावरून वारंवार भांडण होत होते. तसेच पोलिसांनी दिलेल्या माहितीनुसार मुलगी ही आपल्या प्रियकरासोबत पळून जात होती. मुलगी ही बराच वेळा पळून गेल्याची घटना घडल्यानंतर या प्रकरणातील संशयित रामकिशोर यांचं मुलीशी वारंवार भांडण होत होते.
मंगळवारी देखील संशयित रामकिशोर आणि त्यांची मुलगी ज्योती भारती हिचे भांडण झाले होते. या भांडणात रामकिशोर यांना राग अनावर झाल्याने त्यांनी राहत्या घरात ओढणीच्या साहाय्याने ज्योती हिचा गळा आवळून तिची हत्या केली. त्यामुळे परिसरात एकच खळबळ उडाली असून परिसरात या घटनेची जोरदार चर्चा सुरू झाली आहे. पोलिसांनी मृतदेहाचा पंचनामा करून शवविच्छेदनसाठी पाठविण्यात आला आहे या प्रकरणातील संशयित आरोपी राम किशोर भारती यांना पोलिसांनी ताब्यात घेतले असून, पुढील तपास अंबड पोलिस करीत आहेत.