no images were found
मम्मीने पाय पकडले, अंकलने पप्पांचा गळा दाबला; निष्पाप मुलांनी सारंच सांगितल्याने खुनाचा गुन्हा उघडकीस
मेरठ : लहान मुलांनी पोलिसांना दिलेल्या जबाबामुळे त्यांच्या आईला अटक झाली. तिच्या प्रियकरालाच्या हातात बेड्या पडल्या. निष्पाप मुलांनी कथन केलेला प्रकार पाहून पोलीस सुन्न झाले. उत्तर प्रदेशच्या मेरठमधील भावनपूर येथील एका व्यक्तीच्या हत्या प्रकरणात खळबळजनक माहिती उघडकीस आली आहे. मेरठमध्ये वास्तव्यास असलेल्या अनिल नावाच्या व्यक्तीची हत्या झाली. अनिलच्या मुलांनी त्याची हत्या पाहिली. त्यांनी झालेला प्रकार पोलिसांना सांगितला.
‘मम्मीने पप्पांचे पाय पकडले होते आणि राहुल अंकलने पप्पांचा गळा दाबला,’ अशी माहिती मुलांनी पोलिसांना दिली. पोलिसांनी मुलांचा जबाब व्हिडीओ रेकॉर्ड केला. पप्पा आरडाओरडा करत होते. त्यांचा आवाज ऐकून आम्ही झोपेतून उठलो. आम्ही मम्मीला रोखण्याचा प्रयत्न केला. मात्र तिनं ऐकलं नाही. तुमचे अंकल चांगले आहेत. आता आपण त्यांच्यासोबत राहू, असं आईनं म्हटल्याचं मुलांनी सांगितलं. अनिलची पत्नी पूनमनं प्रियकर राहुलच्या मदतीनं हत्या केली. राहुल अनेकदा अनिलच्या घरी यायचा. अनिलच्या कुटुंबीयांनी अनेकदा याबद्दल आक्षेप नोंदवला. शेजारच्यांना याची कल्पना होती. यावरून कुटुंबात अनेकदा वाद झाले. राहुल माझा भाचा आहे. मी त्याला मुलगा मानते, असं पूनम सांगायची. अनिलला पूनम आणि राहुलवर संशय होता. त्यामुळे पूनम आणि राहुलनं अनिलचा काटा काढण्याचा निर्णय घेतला.
सोमवारी रात्री राहुल आणि पूनम यांनी अनिलची हत्या केली. हृदयविकाराच्या झटक्यानं अनिलचा मृत्यू झाल्याचं पूनमनं सगळ्यांना सांगितलं. तिनं रडण्याचं नाटक केलं. मंगळवारी सकाळी गुपचूपपणे अनिलवर अंत्यसंस्कार करण्यात आले. याची माहिती मिळताच पोलीस गावात पोहोचले. त्यानंतर प्रेमी युगुलाला अटक करण्यात आली. दोघांनी गुन्ह्याची कबुली दिली. त्याचा विवाह १० वर्षांपूर्वी हापुडमधील पूनमसोबत झाला. दोघांना सहा वर्षांची मुलगी आणि चार वर्षांचा मुलगा आहे. अम्हैडा गंगानगरमध्ये वास्तव्यास असलेला राहुल दोन महिन्यांपूर्वी अनिलच्या घरी राहायला आला. राहुल आपला मानलेला भाऊ असल्याचं पूनम सांगायची. मात्र तिचे राहुलसोबत अवैध संबंध होते. त्यांच्याबद्दल अनिलला संशय होता. त्यानं विरोधही दर्शवला. त्यावरून दोघांमध्ये अनेकदा वाद झाले होते .
