‘दृष्टीहीन महिलांसाठी तंत्रज्ञान’ कार्यशाळेला विद्यापीठात उत्साही प्रतिसाद

Oplus_131072

‘दृष्टीहीन महिलांसाठी तंत्रज्ञान’ कार्यशाळेला विद्यापीठात उत्साही प्रतिसाद
कोल्हापूर,: शिवाजी विद्यापीठाच्या ‘युजीसी स्कीम फॉर पर्सन्स विथ डिसॅबिलिटीज आणि समावेशी शिक्षण संसाधन केंद्राच्या वतीने “दृष्टीहीन महिलांसाठी तंत्रज्ञान” या विषयावर एकदिवसीय कार्यशाळेला मोठा उत्साही प्रतिसाद लाभला.
विद्यापीठाचे कुलसचिव डॉ. विलास शिंदे यांच्या हस्ते रोपट्याला पाणी घालून कार्यशाळेचे उद्घाटन करण्यात आले. दूरशिक्षण केंद्र संचालक डॉ. प्रतिभा पाटणकर यांची प्रमुख उपस्थिती होती.
यावेळी डॉ. विलास शिंदे यांनी यावेळी ‘दृष्टीदिव्यांग महिलांसाठी विकास धोरण’ या विषयावर व्याख्यान दिले. छत्रपती शिवाजी महाराजांच्या काळातील अनाथ आणि दिव्यांगांसाठी असलेल्या कल्याणकारी तरतुदींचा ऐतिहासिक संदर्भ त्यांनी दिला. संतोष परीट यांनी ‘दृष्टीहीन महिलांच्या जीवनात तंत्रज्ञानाचे महत्त्व’ या विषयावर विचार मांडले.
दुसऱ्या सत्रात नॅबचे उपाध्यक्ष उदय माने यांनी ‘दृष्टीहीन महिलांची सुरक्षा व त्यासाठीच्या उपाययोजना’ यावर मार्गदर्शन केले. स्कूल ऑफ नॅनोसायन्सचे डॉ. प्रमोद पाटील यांनी ‘दैनंदिन जीवनात प्राणायामाचे महत्त्व’ आणि डॉ. प्रतिभा देसाई यांनी “स्वयंशिस्त व शी टॉक उपक्रमांतर्गत दृष्टीहीन महिलांशी संवाद’ यावर मार्गदर्शन केले.
कार्यशाळेस उपस्थित सर्व दृष्टीदिव्यांग महिलांनी विद्यापीठात पी.एम. उषा योजनेअंतर्गत सुरू असलेल्या चॉकलेट प्रकल्पाला भेट दिली. कल्याणी माने यांनी सूत्रसंचालन केले. सतीश नवले यांनी आभार मानले.