no images were found
ठरलं तर मग मालिकेतील सायली-अर्जुनचं अनोखं वेषांतर
स्टार प्रवाहची ठरलं तर मग मालिका सध्या अतिशय रंजक वळणावर आहे. मुलींच्या अपहरणाच्या खोट्या आरोपाखाली अटक झाल्यानंतर सायली आणि अर्जुनने मिळून या प्रकरणाचा छडा लावायचा ठरवलंय. त्यासाठीच महिपत आश्रमात वेषांतर करुन ते शोध घेण्यासाठी पोहोचणार आहेत. मालिकेतला जुई गडकरी आणि अमित भानुशालीचा हा लूक लक्षवेधी ठरणार आहे.
अर्जुनची भूमिका साकारणारा अमित भानुशाली या नव्या लूकसाठी तब्बल दोन तास मेकअपच्या प्रक्रियेतून जातोय. अमितच्या या लूकसाठी प्रॉस्थेटिक मेकअपचा वापर करण्यात आला आहे. त्यामुळे शूटिंगसोबतच मेकअप करण्यासाठी आणि शूटिंगनंतर तो काढण्यासाठीही अमितला बराच वेळ द्यावा लागतोय. मात्र, व्यक्तिरेखेच्या या नव्या रूपासाठी अमितची मेहनतही तितकीच खास आहे. या लूकमध्ये रेडी झाल्यावर अमितने पहिल्यांदा जेव्हा आरशात स्वत:ला पाहिलं तेव्हा तो ओळखूच शकला नाही. अमितच काय सेटवरील इतर मंडळीही अमितला ओळखू शकले नाहीत.
दुसरीकडे, सायलीची भूमिका साकारणाऱ्या जुई गडकरीचा अनुभव मात्र याच्या अगदी उलट आहे. जुई मंजुळा जाधव या रूपात दिसणार असून या लूकसाठी तिने स्वतःच मेकअप केला आहे. विशेष म्हणजे अवघ्या दहा मिनिटांत जुईने हा मेकअप पूर्ण केला. या रॉ आणि साध्या लूकमुळे जुईलाही तो खूप आवडला आहे. या लूकसाठी फारसा मेकअप किंवा टचअपची गरज नसल्याने शूटिंगदरम्यान तिचा वेळही वाचतोय.
सायली आणि अर्जुन महिपत आश्रमात पोहोचून या प्रकरणामागचं सत्य शोधू शकतील का? त्यांचं वेषांतर कोणाच्या लक्षात येणार का? हे पहाण्यासाठी नक्की पहा ठरलं तर मग रात्री ८.३० वाजता फक्त स्टार प्रवाहवर.
