no images were found
दुसऱ्या समाजातील मुलासोबतच्या प्रेमसंबंधामुळे पित्याने कालव्यात ढकलून केली मुलीची हत्या
बेल्लारी : समाजातील मुलासोबत मुलीचे दुसऱ्या असलेल्या प्रेमसंबंधामुळे नाराज झालेल्या पित्याने कालव्यात ढकलून मुलीची हत्या केल्याची धक्कादायक घटना घडली आहे. याप्रकरणी पोलिसांनी ओमकार गौडा या आरोपी पित्याला अटक केली आहे. बेल्लारी येथील कुडाठिणी शहरात ही घटना घडली आहे.
ओमकार गौडा यांच्या मुलीचे दुसऱ्या समाजातील मुलासोबत प्रेमसंबंध सुरु होते. याची माहिती मिळताच ओमकार यांनी आपल्या मुलीला हे प्रेमसंबंध तोडण्यासाठी समजावले होते. मात्र मुलगी ऐकायला तयार नव्हती. यामुळे ओमकार याचा संताप झाला होता.
संतापलेल्या ओमकार याने मुलीच्या हत्येचा कट रचला. यासाठी ते आधी 31 ऑक्टोबर रोजी मुलीला चित्रपट पहायला घेऊन गेले. चित्रपट पाहिल्यानंतर शॉपिंगला नेले. त्यानंतर ज्वेलरी दुकानात जाऊन दागिने खरेदी केले. सर्व शॉपिंग आटोपल्यानंतर दोघे घरी परतत होते. घरी परतत असताना ओमकारने वाटेत एचएलसी कॅनॉलजवळ कार थांबवली आणि मुलीला गाडीतून बाहेर यायला सांगितले. मुलगीही काहीही विचार न करता गाडीतून खाली उतरली. त्यानंतर निर्दयी बापाने तिला मागून धक्का देत कालव्यात ढकलले. कालव्यात बुडून मुलीचा मृत्यू झाला. त्यानंतर बाप घरी न जाता तिरुपतीला गेला.
वडील आणि मुलगी घरी न आल्याने मुलीच्या आई आणि भावाने दोघेही बेपत्ता झाल्याची तक्रार स्थानिक पोलीस ठाण्यात दाखल केली. त्यानंतर पोलिसांनी तपास सुरू केला. त्यानंतर दुसऱ्या दिवशी बाप घरी परतल्यावर पोलिसांनी त्याची चौकशी केली. पोलीस चौकशी होताच आरोपी भांबावला आणि मुलीच्या हत्येची माहिती पोलिसांना दिली. पोलिसांनी आरोपीविरुद्ध खुनाचा गुन्हा दाखल करून त्याला अटक केली आहे. मुलीच्या मृतदेहाचा कालव्यात शोध घेण्यात येत आहे.
