no images were found
शिवाजी विद्यापीठात बी.एस्सी. मायक्रोबायोलॉजी (AEDP) अभ्यासक्रमास प्रारंभ – उद्योगसज्ज पदवीसाठी सुवर्णसंधी
कोल्हापूर (प्रतिनिधी):, कोल्हापूरच्या सूक्ष्मजीवशास्त्र विभागामध्ये शैक्षणिक वर्ष २०२५–२६ पासून बी.एस्सी. मायक्रोबायोलॉजी (औद्योगिक प्रशिक्षण अंतर्भूत पदवी अभ्यासक्रम – AEDP) (B. Sc. Microbiology – Apprenticeship Embedded Degree Programme) या अभिनव अभ्यासक्रमाची सुरुवात करण्यात आली आहे. राष्ट्रीय शैक्षणिक धोरण २०२० (NEP 2020) आणि विद्यापीठ अनुदान आयोगाच्या (UGC-AEDP) मार्गदर्शक तत्त्वांनुसार विकसित करण्यात आलेला हा अभ्यासक्रम शिक्षणासोबतच प्रत्यक्ष औद्योगिक प्रशिक्षण देणारा महाराष्ट्रातील पहिला अभ्यासक्रम ठरणार आहे. या अभ्यासक्रमांतर्गत विद्यार्थ्यांना सैद्धांतिक शिक्षणासोबतच शेवटच्या सत्रात (संपूर्ण सत्र) प्रत्यक्ष औद्योगिक प्रशिक्षण (Full-Semester Apprenticeship with stipend) दिले जाणार आहे. त्यामुळे शिक्षण व त्यासोबत प्रत्यक्ष औद्योगिक प्रशिक्षण या दोहोंचा समन्वय साधत विद्यार्थ्यांना विविध व्यावसायिक संधींसाठी तयार करण्यात येणार आहे.
उद्योगसज्जता आणि व्यावसायिक संधी
या अभ्यासक्रमाचे प्रमुख उद्दिष्ट म्हणजे विद्यार्थ्यांना उद्योगसज्ज (Industry-Ready) बनवणे हे असून या अभ्यासक्रमातून पदवीधर होणाऱ्या विद्यार्थ्यांना उच्च शिक्षण, संशोधन संस्था, औषध निर्मिती उद्योग, दुग्ध व अन्न प्रक्रिया उद्योग, कृषी जैवतंत्रज्ञान व जैविक खते उत्पादन, वैद्यकीय निदान प्रयोगशाळा, तसेच पर्यावरणीय विश्लेषण व संशोधन अशा अनेक क्षेत्रांमध्ये करिअरची संधी उपलब्ध होणार आहेत. तसेच, इच्छुक विद्यार्थी जैवउद्योजकता (Bioentrepreneurship) क्षेत्रात स्वतःचे स्टार्टअप सुरू करू शकतात.
