no images were found
‘उद्योजकतेला प्रोत्साहन आणि सामाजिक समावेशन’ विद्यापीठात राष्ट्रीय परिषदेचे आयोजन
कोल्हापूर, (प्रतिनिधी):- शिवाजी विद्यापीठाच्या सामाजिक समावेशन अभ्यास केंद्राच्यावतीने दिनांक २७ व २८ फेब्रुवारी रोजी ‘उद्योजकतेला प्रोत्साहन आणि सामाजिक समावेशन’ या विषयावर राष्ट्रीय परिषदेचे आयोजन करण्यात आले आहे. या परिषदेचे उद्घाटन दिनांक २७ रोजी श्री. सुहास पालेकर, पुणे यांच्या बीजभाषणाने होणार असून याप्रसंगी अध्यक्षस्थान कुलगुरू प्रा. डी. टी. शिर्के भूषविणार आहेत.
या राष्ट्रीय परिषदेस देशभरातून प्राध्यापक, संशोधक व अभ्यासक उपस्थित राहणार असून ते उद्योजकता विकास, उद्योजकता विकासास पूरक संस्था व आवश्यक वातावरण निर्मिती, महिलांसाठी उद्योजकता विकास, कृषी विकास आणि शास्वत विकासाचे धोरण, उद्योजकतेद्वारे सामाजिक समावेशन, शिक्षण आणि कौशल्य विकास, उद्योजकतेसाठी आवश्यक अर्थसाह्य, सर्वसमावेशक विकासासाठी सूक्ष्म उद्योजकता इत्यादी विषयावर शोधनिबंध सादर करणार आहेत. तसेच या विषयातील तज्ज्ञ व अभ्यासक मांडणी करणार आहेत.
या राष्ट्रीय परिषदेचे आयोजन विद्यापीठाच्या मानव्यशास्त्र सभागृहामध्ये करण्यात आले आहे. तरी या राष्ट्रीय परिषदेस प्राध्यापक, संशोधक, सामाजिक कार्यकर्ते, विद्यार्थी इत्यादींनी सहभागी व्हावे असे आवाहन कुलसचिव डॉ. व्ही. एन. शिंदे व अभ्यास केंद्राचे संचालक प्रा. डॉ. श्रीकृष्ण महाजन यांनी केले आहे.
