इचलकरंजी हे देशाचे मँचेस्टर होण्यासाठी बँका व उद्योजकानी प्रयत्न करावेत : मोरे

इचलकरंजी हे देशाचे मँचेस्टर होण्यासाठी बँका व उद्योजकानी प्रयत्न करावेत : मोरे

कोल्हापूर : इचलकरंजी हे फक्त महाराष्ट्राचे मँचेस्टर न राहता सर्व उद्योजक व बँका यांच्या समन्वयाने इचलकरंजीस देशाचे मँचेस्टर झाले पाहिजे यासाठी प्रयत्न करण्याचे आवाहन रिजर्व बँक ऑफ इंडियाच्या वित्तीय समावेशन विकास विभागाच्या महाव्यवस्थापक श्रीमती कल्पना मोरे यांनी केले.

दरबार बँक्वेट हॉल, फॉरचुन प्लाझा इचलकरंजी येथे रिजर्व बँक ऑफ इंडिया तर्फे आयोजित एमएसएमई बैठकीदरम्यान श्रीमती मोरे बोलत होत्या.

या चर्चेदरम्यान विविध ग्राहक तसेच असोसिएशनचे पदाधिकारी यांनी आपल्या अडचणी व सूचना रिजर्व बँकेच्या अधिकाऱ्यांसमोर मांडल्या. यामध्ये सीजीटीएमएसई फी, सीजीएफएमयू फी, व्याजदर मध्ये सवलत, कोविड काळात शासन निर्देशानुसार जारी केलेल्या Emergency Credit line Guarantee scheme या योजना पुन्हा सुरू करणे ई. बाबींचा विचार शासनाकडून होणेची मागणी करून बँकांनी आपले सेवा शुल्कमध्ये कपात करून ग्राहकांना दिलासा देणेची सुद्धा विनंती असोसिएशन च्या पदाधिकाऱ्यांनी केली. या चर्चासत्रा दरम्यान रिजर्व बँकेस प्राप्त सर्व सूचना संबंधित विभागास निर्देशित करून योग्य तो पाठपुरावा करू असेही श्रीमती कल्पना मोरे यांनी नमूद केले. तसेच इचलकरंजी येथे उद्योगधंद्याना पोषक वातावरण असून जास्तीत जास्त रोजगार निर्मिती करणारे हे क्षेत्र असल्याने येथे सर्व प्रमुख बँकेच्या एमएसएमईच्या विशेष शाखा सुरू करणेबाबत विविध बँकांच्या वरिष्ट अधिकाऱ्याना सूचना केल्या.

यावेळी सिडबी पुणेचे उपमहाव्यवस्थापक रमाकांत राहाटे, राज्यस्तरीय बँकर्स समितीचे उपमहाव्यवस्थापक श्री आर. डी . देशमुख, बँक ऑफ इंडियाचे राज्यस्तरीय उपमहाव्यवस्थापक श्री मिलिंद गवसाने, स्टेट बँक ऑफ इंडिया पुणे चे उपमहाव्यवस्थापक श्री एम. एन. प्रसाद, बँक ऑफ बडोदा पुणे चे उप महाव्यवस्थापक श्री एम. निशात, बँक ऑफ इंडिया कोल्हापूरचे विभागीय व्यवस्थापक श्री हेमंत खेर, अग्रणी जिल्हा व्यवस्थापक श्री गणेश गोडसे व  कोल्हापूर जिल्ह्यातील इतर सर्व प्रमुख बँकांचे विभागीय/क्षेत्रीय व्यवस्थापक तसेच शहरातील विविध व्यवसायसंबंधी क्लस्टर/असोसिएशन चे पदाधिकारी व ग्राहक मोठ्या संख्येने उपस्थित होते. सूत्रसंचालन रिजर्व बँक ऑफ इंडियाचे अधिकारी  विश्वजित करंजकर यांनी केले.