ज्यांना संविधानाचं, नियमाचं ज्ञान नाही अशांनी बोलू नये, -राहुल नार्वेकर

महाराष्ट्र विधानसभेचे अध्यक्ष राहुल नार्वेकर यांच्यासमोर सध्या शिवसेनेच्या दोन्ही गटांमधील आमदार अपात्रतेची सुनावणी चालू आहे. सर्वोच्च न्यायालयाने फटकारल्यानंतर यासंदर्भात राहुल नार्वेकरांनी सुनावणीचं वेळापत्रक जाहीर केलं. मात्र, अपात्रतेचा निर्णय घेण्यासाठी राहुल नार्वेकरांकडून चालढकल केली जात असल्याचा आरोप विरोधकांकडून सातत्याने केला जात आहे. त्यावर माध्यमांशी बोलताना राहुल नार्वेकरांनी आज आपली भूमिका स्पष्ट केली. यावेळी त्यांनी विरोधकांवर टीकाही केली.
राहुल नार्वेकरांच्या विदेश दौऱ्यावरून गेल्या आठवड्याभरात मोठं राजकारण रंगल्याचं पाहायला मिळालं. सुनावणी प्रलंबित ठेवून नार्वेकर विदेश दौऱ्यावर जात असल्याची टीका विरोधकांनी केली होती. यासंदर्भात नार्वेकरांनी आपली भूमिका स्पष्ट केली. “माझा परदेश दौरा मी २६ तारखेलाच रद्द केला होता. काही पूर्वनियोजित कार्यक्रमांमुळे मी परिषदेला उपस्थित राहणार नाही हे मी २६ तारखेलाच कळवलं होतं. पण २८ तारखेला त्यावर मोठी चर्चा घडवून आपणच हा दौरा रद्द करायला लावला असं चित्र लोकांसमोर आणायचा केविलवाणा प्रकार लोकांनी केला”, असं राहुल नार्वेकर म्हणाले.