फळे व भाजीपाला फिरत्या विक्री केंद्रासाठी प्रस्ताव सादर करा

कोल्हापूर : फळे व भाजीपाला फिरते विक्री केंद्राकरिता शीतचेंबरच्या सुविधेसह उत्पादकांकडून रेखांकन आराखडा व अंदाजपत्रक मागविण्यात येत आहे. इच्छुक उत्पादक व पुरवठादारांनी  info@mahantem.in या ईमेल पत्त्यावर प्रस्ताव सादर करावेत, असे आवाहन जिल्हा अधीक्षक कृषी अधिकारी दत्तात्रय दिवेकर यांनी केले आहे.

महाराष्ट्र राज्य फलोत्पादन व औषधी वनस्पती मंडळामार्फत एकात्मिक फलोत्पादन विकास अभियान योजना राबविण्यात येते. योजनेमध्ये पणन सुविधा अंतर्गत फळे व भाजीपाला विक्रीकरिता शीतचेंबरच्या सुविधेसह फिरते विक्री केंद्र या घटकास प्रोत्साहन दिले जाते. ग्राहकांच्या सुविधेसाठी लोकवस्तीमध्ये, लोकवस्तीजवळ कमी खर्चाचे फिरते फळे-भाजीपाला विक्री हातगाडी /केंद्र स्थापन करुन आवश्यक त्या वेळेस ग्राहकांना फळे व भाजीपाला पुरविणे, हा या घटकाचा मुख्य उद्देश आहे. या घटकामध्ये कुल चेंबरच्या सुविधेसह हातगाडी विक्री कट्टा, वजनकाटे इ. भांडवली खर्च अनुदानासाठी ग्राह्य धरला जातो व प्रकल्प खर्चाच्या ५० टक्के किंवा कमाल १५ हजार रुपये अर्थसहाय्य उपलब्ध आहे. या घटकाकरिता सुयोग्य असा रेखांकन आराखडा व अंदाजपत्रक निश्चित करावयाचे आहे. याकरिता इच्छुक उत्पादक व पुरवठादार कंपन्यांकडून फळे व भाजीपाला फिरते विक्री केंद्र शीतचेंबरच्या सुविधेसह (Mobile Vending Cart Platform with cool chamber) याकरीता रेखांकन आराखडा व प्रस्ताव ऑनलाईन मागविण्यात येत आहेत. प्रस्ताव सादर करण्याकरिता अटी शर्ती कृषी विभागाच्या www.krishi.maharashtra.gov.in या संकेतस्थळावर उपलब्ध आहेत.