“नवीन कामगार संहिता व त्यांचे व्यवस्थापनावरील परिणाम” विषयावर व्यवस्थापन विकास कार्यक्रमाचे आयोजन

Oplus_131072

“नवीन कामगार संहिता व त्यांचे व्यवस्थापनावरील परिणाम” विषयावर व्यवस्थापन विकास कार्यक्रमाचे आयोजन
कोल्हापूर (प्रतिनिधी): शिवाजी विद्यापीठ, कोल्हापूर येथील यशवंतराव चव्हाण स्कूल ऑफ रूरल डेव्हलपमेंट, अर्थशास्त्र विभाग – स्वायत्त तसेच कौशल्य व उद्योजकता विकास केंद्र यांच्या संयुक्त विद्यमाने पीएम-उषा सॉफ्ट कॉम्पोनंट उपक्रमांतर्गत “नवीन कामगार संहिता व त्यांचे व्यवस्थापनावरील परिणाम” या विषयावर व्यवस्थापन विकास कार्यक्रम (Management Development Program – MDP) आयोजित करण्यात आला आहे.
हा कार्यक्रम शनिवार, दि. ३ जानेवारी २०२६ रोजी दुपारी ३.०० वाजल्यापासून शिवाजी विद्यापीठ, कोल्हापूर येथील मानवविद्या सभागृह येथे संपन्न होणार आहे.
या कार्यक्रमासाठी उद्योग, मानव संसाधन व कामगार कायदे क्षेत्रातील नामवंत तज्ज्ञ संसाधन व्यक्ती म्हणून उपस्थित राहणार आहेत. यामध्ये डॉ. संतोष भावे, माजी संचालक (एचआर व आयआर), भारत फोर्ज लिमिटेड; ॲड. वरुण जोशी, उच्च न्यायालयातील अधिवक्ता व कामगार कायदा तज्ज्ञ; ॲड. दीपक जोशी, कामगार कायदे विषयातील प्रॅक्टिसिंग वकील, कोल्हापूर; तसेच ॲड. राजेंद्र चव्हाण, माजी अध्यक्ष, कोल्हापूर बार असोसिएशन यांचा समावेश आहे.
सदर कार्यक्रमात नवीन कामगार संहितांची संकल्पना, त्यांची अंमलबजावणी, तसेच उद्योग व व्यवस्थापनावर होणारे परिणाम यावर सखोल मार्गदर्शन करण्यात येणार आहे. हा कार्यक्रम शिक्षक, संशोधक, प्रशासकीय अधिकारी, उद्योग क्षेत्रातील प्रतिनिधी, उद्योजक व विद्यार्थ्यांसाठी अत्यंत उपयुक्त ठरणार आहे. सदरच्या एमडीपी चे प्रायोजक रोटरी क्लब ऑफ इचलकरंजी एक्झिक्युटिव आहेत.
कार्यक्रमाच्या यशस्वी आयोजनासाठी आयोजक विभागांच्या वतीने व्यापक तयारी करण्यात आली असून इच्छुक एच आर व्यवस्थापकानी विद्यापीठाच्या संकेत स्थळावर एमडीपी करता नोंदणी करावी, असे आवाहन आयोजकाच्या मार्फत करण्यात आले आहे.