शिवरायांचा छावा सिनेमाचं पोस्टर प्रदर्शित, मुख्यमंत्री एकनाथ शिंदेंचं ते ट्विट चर्चेत

मुंबई : ऐतिहासिक चित्रपटांमधून मोठ्या पडद्यावर शिवकार्य दाखवणाऱ्या लेखक-दिग्दर्शक दिग्पाल लांजेकर याची छत्रपती शिवाजी महाराजांप्रती असलेली निष्ठा सर्वश्रुत आहे. आता केवळ चित्रपटांतूनच नव्हे; तर आपल्या प्रत्यक्ष कृतीतूनदेखील त्यानं शिवकार्याचा प्रचार आणि प्रसार केल्याचं दिसतंय. अमूल्य ऐतिहासिक वारसाचं जतन आणि संवर्धन व्हावं यासाठी तो प्रयत्नशील आहे. शिवराज अष्टकातल्या ‘फर्जंद’, ‘फत्तेशिकस्त’, ‘पावनखिंड’, ‘शेर शिवराज’ ‘सुभेदार’ या पाच सिनेमांमधून त्यानं शिवकालावर बेतलेल्या ऐतिहासिक चित्रपटांवरची आपली मजबूत पकड दाखवून दिली. आता त्याचा आणखी एक सिनेमा प्रेक्षकांच्या भेटीला येतोय. या सिनेमाला महाराष्ट्राचे मुख्यमंत्री एकनाथ शिंदे यांनी खास शुभेच्छा दिल्या आहेत.
बंदिस्त पटकथा, दमदार संवाद, दिग्गज कलाकारांचा अभिनय, तंत्रकुशल टीम आणि जबरदस्त दिग्दर्शनाची जोड यामुळं दिग्पालच्या सिनेमांची प्रेक्षकांना उत्सुकता असते. आता त्याचा ‘शिवरायांचा छावा’ हा शिवपुत्र छत्रपती संभाजी महाराजांवरील सिनेमा प्रेक्षकांच्या भेटीला येणार आहे. मुख्यमंत्री एकनाथ शिंदे यांनी ‘शिवरायांचा छावा’ चित्रपटाचं मोशन पोस्टर पाहून त्याचं तोंडभरून कौतुक केलं असून या चित्रपटाला शुभेच्छा दिल्या आहेत.
दिग्पाल लांजेकरांनी सांगितलं छत्रपतींसाठी कशी बदलली प्रेक्षकांची मानसिकता
स्वराज्याचे धाकले धनी छत्रपती संभाजी महाराज यांच्या आयुष्यावर आधारित चित्रपट प्रेक्षकांच्या भेटीला येणार असल्यानं प्रेक्षकांनाही प्रचंड उत्सुकता आहे. नुकतीच या चित्रपटाची घोषणा करण्यात आली आहे. सोबतच चित्रपटाचं पहिलं मोशन पोस्टरदेखील प्रदर्शित करण्यात आलं आहे. या चित्रपाटातून संभाजी महाराजांच्या आयुष्यातील न उलगडलेली पानं प्रेक्षकांच्या समोर येणार आहेत.
मुख्यमंत्र्यांनी ट्विट करत लिहिलं आहे की, धर्मसंरक्षक छत्रपती संभाजी महाराज यांच्या चरित्रावर आधारित पहिला भव्यदिव्य चित्रपट शिवरायांचा छावा येत्या १६ फेब्रूवारी २०२४ रोजी प्रदर्शित होत आहे. चित्रपटाचे दिग्दर्शक दिग्पाल लांजेकर, निर्माते मल्हार पिचर्स आणि वैभव भोर, किशोर पाटकर तसेच संपूर्ण टीमला शुभेच्छा.
या सिनेमात पुन्हा एकदा छत्रपती शिवाजी महाराजांच्या भुमिकेत अभिनेता चिन्मय मांडलेकर तर जिजाऊसाहेबांच्या भुमिकेत अभिनेत्री मृणाल कुलकर्णी झळकणार आहेत.याशिवाय विक्रम गायकवाड, अभिजीत श्वेतचंद्र, भूषण विनतरे, अमित देशमुख हे कलाकार झळकणार आहेत. सिनेमात संभाजी महाराजांची भुमिका कोण साकारणार हे अद्याप गुलदस्त्यात आहे.