ग्रामीण पाणीपुरवठा विभागाच्या उपअभियंता यांना लाच घेताना रंगेहाथ पकडले

कोल्हापूर : जिल्ह्यात एका बाजूला अनंत चतुर्दशीचा उत्साह पाहायला मिळत होता. भावपूर्ण वातावरण निरोप देत गणेश मूर्तींचे विसर्जन केले जात होते. मात्र कोल्हापुरातील चंदगड येथे एक महिला अधिकारी जलजीवन नळ पाणीपुरवठा कामाचे १२ लाख रुपयांचे बिल मंजूर करण्यासाठी २५ हजार रुपयांची लाच घेण्यात व्यस्त होत्या

कोल्हापुरातील चंदगड ग्रामीण पाणीपुरवठा विभागाच्या उपअभियंता सुभद्रा लक्ष्मणराव कांबळे (रा. बेळगाव, हनुमान नगर, भक्तीवेस मंगल कार्यालयाजवळ, मूळ पत्ता, आधारवाडी जेल रोड, कल्याण पश्चिम जि. ठाणे) असे या अधिकाऱ्याचे नाव असून यांना लाचलुचपत प्रतिबंधक विभागाने रंगेहाथ पकडले आहे. या प्रकरणी चंदगड पोलीस ठाण्यात गुन्हा दाखल करण्यात आला असून या घटनेमुळे जलजीवन विभागात एकच खळबळ उडाली आहे.

मिळालेल्या माहितीनुसार, जलजीवन मिशन योजने अंतर्गत चंदगड तालुक्यातील घुल्लेवाडीमधील नळपाणी पुरवठा योजना सुधारीकरणाचे काम सुरू होत. यावेळी घुल्लेवाडीमध्ये जलजीवन नळपाणी पुरवठा कामाचे १२ लाखाचे बिल मंजूर करण्यासाठी तक्रारदाराने सुभद्रा कांबळे यांना विनंती केली,मात्र हे बिल मंजूर करण्यासाठी सुभद्रा कांबळेनं तीन टक्के दराने ३३ हजार रुपयांच्या लाचेची मागणी केली.यानंतर तडजोडीअंती २५ हजार रुपये लाच देण्याचे ठरले.

दरम्यान तक्रारदारांनी लाचलुचपत प्रतिबंधक विभागाकडे याची तक्रार केली. लाच लुचपत प्रतिबंधक विभागाने सापळा रचला आणि लाचेची ठरलेली रक्कम तक्रारदाराकडून स्वतः सुभद्रा स्वीकारताना लाचलुचपत प्रतिबंधक विभागाने रंगेहाथ पकडले. याबाबत चंदगड पोलिस ठाण्यात गुन्हा दाखल करण्यात आला असून ही कारवाई लाचलुचपत प्रतिबंधक विभागाचे पोलीस उपअधीक्षक सरदार नाळे यांच्या मार्गदर्शनात पोसई संजीव बंबरगेकर, पोहेकॉ विकास माने, सुनील घोसाळकर, पोना सचिन पाटील, मपोकॉ पुनम पाटील, चापोहेकॉ विष्णू गुरव यांनी केली.