अवर्सेकरांवर CBIचे छापे, ३८४७ कोटींचं कर्ज बुडवल्याचा आरोप

मुंबई :मुंबई तसेच राज्यातील अनेक महत्त्वाचे प्रकल्प मार्गी लावणाऱ्या युनिटी इन्फ्रा प्रोजेक्ट्स लिमिटेड आणि कंपनीच्या संचालकांविरोधात केंद्रीय अन्वेषण विभागाने (सीबीआय) गुन्हा दाखल केला आहे. स्टेट बँक ऑफ इंडियासह (एसबीआय) इतर १५ बँकांचे सुमारे ३८४७ कोटी रुपयांचे कर्ज बुडविल्याचा आरोप त्यांच्यावर आहे. अनेक राजकीय पक्ष आणि नेत्यांशी जवळीक असलेल्या किशोर अवर्सेकर आणि त्यांच्या कुटुंबीयांवर गुन्हा दाखल झाल्याने उलटसुलट चर्चा सुरू असून, उद्धव ठाकरे यांच्या ‘मातोश्री’ निवासस्थानचेही त्यांनी नूतनीकरण केल्याने या कारवाईला आणखी महत्त्व आले आहे. या गुन्ह्यानंतर सोमवारी त्यांच्याशी संबंधित कार्यालये, निवासस्थानी छापेही टाकण्यात आले.
आरोपींनी लोकसेवक आणि काही इतर व्यक्तींच्या मदतीने गुन्हेगारी कट रचून स्टेट बँक ऑफ इंडिया आणि इतर बँकांच्या समूहांची ३८४७ कोटी ५८ लाख रुपयांची फसवणूक केल्याची तक्रार ‘एसबीआय’च्या वतीने उपमहाव्यवस्थापक रजनी ठाकूर यांनी केली होती. युनिटी इन्फ्रा प्रोजेक्ट्स लिमिटेडने एसबीआय आणि इतर बँकांकडून विविध सुविधांद्वारे कर्ज घेतले होते. ते बुडीत निघाल्यामुळे बँकांचे सुमारे ३,८४७ कोटी रुपयांचे नुकसान झाले. त्यानंतर बँकांकडून न्यायवैद्यक लेखापरीक्षण करण्यात आले. लेखापरीक्षण अहवालात गैरव्यवहार झाल्याचे उघड झाल्यानंतर याबाबत तक्रार करण्यात आली. या तक्रारीची प्राथमिक चौकशी केल्यानंतर सीबीआयने युनिटी इन्फ्राप्रोजेक्ट्स लिमिटेड, तिचे अध्यक्ष आणि व्यवस्थापकीय संचालक किशोर अवर्सेकर, उपाध्यक्ष अभिजीत अवर्सेकर, कार्यकारी संचालक आशिष अवर्सेकर आणि संचालक पुष्पा अवर्सेकर यांच्याविरोधात गुन्हा दाखल केला आहे. अवर्सेकर यांच्या युनिटी इन्फ्रा प्रोजेक्टस लिमिटेडने कलानगर येथील ठाकरे कुटुंबीयांचा मातोश्री बंगला, दादर टीटी उड्डाणपूल आणि सीएसएमटी येथील भुयारी मार्गाचे बांधकाम तसेच आगीत नुकसान झालेल्या मंत्रालयाच्या इमारतीचे नूतनीकरण केले होते.
सीबीआयच्या पथकाने गुन्हा दाखल केल्यानंतर अवर्सेकर यांचे कार्यालय तसेच निवासस्थान अशा चार ठिकाणी छापे टाकले. या छाप्यांमध्ये काही महत्त्वपूर्ण कागदपत्रे हस्तगत करण्यात आल्याचे सीबीआयने म्हटले आहे.