रागाने बघितल्याच्या कारणावरून तरुणावर चाकू हल्ला

रागाने बघितल्याच्या कारणावरून पुलाची शिरोली (ता. हातकणंगले) येथील युवकावर चाकू हल्ला केला. रात्री साडेसातच्या सुमारास ही घटना घडली. ऋषिकेश बजरंग पवार असे जखमीचे नाव आहे.
ऋषिकेशचे वडील बजरंग पवार यांनी याबाबत शिरोली एमआयडीसी पोलीस ठाण्यात तक्रार दिली. त्यांच्या तक्रारीवरून अमोल वसंत चौगुले, वैभव राजू जाधव, राजू भीमराव जाधव, राहुल रंगराव आसुर्लेकर व भीमराव मारुती जाधव यांच्याविरुद्ध गुन्हा दाखल झाला आहे.
पोलिसांनी दिलेल्या माहिती वरून अमोल चौगुले, वैभव जाधव, राजू जाधव, भीमराव जाधव व राहुल आसुर्लेकर हे पाचजण रात्री ऋषिकेशच्या घरी जाऊन त्यांनी ऋषिकेशच्या वडिलांना ऋषिकेशला ताकीद द्या, तो आमच्याकडे रागाने बघतो असे म्हणत शिवीगाळ केली.ऋषिकेशला तू चौकात ये, तुला बघून घेतो अशी धमकी दिली. त्यावेळी अमोल चौगुलेने त्याच्या पाठीत चाकूने वार केला.
यामध्ये ऋषिकेश जखमी झाला. उपचारासाठी त्याला कोल्हापुरातील सरकारी दवाखान्यात दाखल केले. सहाय्यक पोलीस निरीक्षक सागर पाटील यांच्या मार्गदर्शनाखाली सहाय्यक फौजदार महाले तपास करत आहेत.