हैदराबादमध्ये मर्सिडीज इंजिनीयर, बँकर पत्नी, आई, लेक चौघांचा संशयास्पद अंत

हैदराबाद : येथील तर्नाका परिसरातील एका फ्लॅटमध्ये चौघांचे मृतदेह आढळून आले. एकाच कुटुंबातील चार सदस्यांचे मृतदेह सापडल्यानं परिसरात खळबळ माजली. बँक व्यवस्थापक आणि तिघांचे मृतदेह राहत्या घरात आढळले. घरात सुसाईड नोट आढळलेली नाही. कौटुंबिक वादातून हा प्रकार घडला असावा असा अंदाज पोलिसांनी प्राथमिक तपासानंतर वर्तवला आहे.

मृतांमध्ये चौघांचा समावेश आहे. सिंधुरा (३२) या बँक ऑफ बडोदाच्या हिमायतनगर शाखेच्या कर्ज वसुली विभागाच्या सेक्शन मॅनेजर होत्या. त्यांचे पती प्रताप (३४) मर्सिडीज बेंझमध्ये डिझाईन इंजिनीयर होते. चार वर्षीय मुलगी आध्या आणि प्रताप यांची ६५ वर्षीय आई रजथी यांचेही मृतदेह घरात सापडले. प्रताप यांचं कार्यालय चेन्नईत होतं. पत्नी सिंधुरानं बदली करावी आणि चेन्नईला यावं अशी प्रताप यांची इच्छा होती. मात्र पत्नीची तयारी नव्हती. चेन्नईत बदली करून घेण्यास तिनं नकार दिला होता.
प्रताप यांचा मृतदेह पोलिसांना त्यांच्या बेडरुममध्ये सापडला. तर पत्नी, आई आणि मुलीचे मृतदेह दुसऱ्या खोलीत सापडले.प्रकरण आत्महत्येचं असावं असा अंदाज ओस्मानिया विद्यापीठाच्या पोलीस ठाण्याचे निरीक्षक एल. रमेश नाईक यांनी वर्तवला. अद्यापपर्यंत मृत्यूचं कारण समजू शकलेलं नाही. फॉरेन्सिक आणि शवविच्छेदन अहवालामधून मृत्यूचं नेमकं कारण समजू शकेल, असं पोलिसांनी सांगितलं.