बच्चू कडू यांचा अपघात, रस्ता ओलांडताना दुचाकीची धडक

अमरावती : प्रहार संघटनेचे नेते, माजी मंत्री  बच्चू कडू  यांचा रस्ता ओलांडताना अपघात झाला. ते रस्ता ओलांडत असताना दुचाकीने जोरदार धडक दिल्याने बच्चू कडू यांच्या डोक्याला, हाताला आणि पायाला जबर मार लागला आहे. त्यांच्या डोक्याला झालेल्या दुखापतीमुळे डोक्यातून मोठ्या प्रमाणावर रक्तस्त्रावही झाला. परंतु सुदैवाने बच्चू कडू या अपघातातून बचावले असून त्यांची प्रकृती ठीक असल्याची माहिती वैद्यकीय सूत्रांनी दिली.

आमदार बच्चू कडू हे आज पहाटे ६ ते ६.३०च्या सुमारास रस्ता ओलांडत होते. नेमके त्याचवेळी एका सुस्साट वेगात आलेल्या दुचाकीने बच्चू कडू यांना जोरदार धडक दिली. या धडकेने बच्चू कडू हे रस्त्यावर कोसळले. त्यामुळे त्यांच्या डोक्याला, हाताला आणि पायाला गंभीर दुखापत झाली. डोक्याला झालेल्या दुखापतीमुळे त्यातून मोठा रक्तस्त्राव झाला. त्यांना तातडीने जवळच्या खासगी रुग्णालयात दाखल करण्यात आले. डोक्याला आणि उजव्या पायाला मोठ्या प्रमाणात इजा झाल्याची माहिती मिळत आहे. बच्चू कडू यांच्या डोक्याला जबर मार लागल्यामुळे त्यांच्या डोक्याला चार टाके घालण्यात आल्याचे वृत्त आहे. त्यांची प्रकृती ठीक तसेच स्थिर असल्याचे सांगण्यात येतेय.

जेव्हा दुचाकीस्वाराने धडक दिली त्यावेळी त्या धडकेमुळे बच्चू कडू हे रोडच्या दुभाजकावर आदळल्याने त्यांच्या डोक्याला मोठ्या प्रमाणात इजा झाली. पुढील तपास पोलीस करीत आहेत.