no images were found
क्रिकेटपटू ऋषभ पंत कार अपघातात गंभीर जखमी, ‘आईला सरप्राईज द्यायला निघाला होता’
देहरादून : क्रिकेटपटू ऋषभ पंत उत्तराखंडमधील रुरकी येथे झालेल्या एका कार अपघातात गंभीररित्या जखमी झाला आहे. ऋषभ पंतच्या कारची डिव्हायडरला धडक बसली आहे. या अपघातात पंतची कार जळून खाक झाली आहे. त्याला देहरादूनच्या मॅक्स हॉस्पिटल मध्ये दाखल करण्यात आलं आहे. “ऋषभ पंतची प्रकृती स्थिर आहे.
देहरादूनस्थित मॅक्स हॉस्पिटलचे डॉ. आशिष याज्ञिक यांनी ऋषभ पंतच्या तब्येतीविषयी सांगितलं की, “ऋषभ पंतची प्रकृती स्थिर आहे. ऑर्थोपेडिक सर्जन आणि प्लास्टिक सर्जनसह डॉक्टरांचं एक पथक त्याच्या दुखापतीची तपासणी करत आहे. तपासणी पूर्ण झाल्यानंतरच पुढील उपचारांची दिशा काय असेल हे कळेल. यासंबंधीची माहिती मेडिकल बुलेटिनद्वारे दिली जाईल.””भारतीय क्रिकेटपटू ऋषभ पंत रस्ते अपघातात जखमी झाल्याची बातमी मिळाली. त्याच्या उपचाराची पूर्ण व्यवस्था करण्याच्या सूचना राज्य सरकारने दिल्या आहेत,” अशी माहिती उत्तराखंडचे मुख्यमंत्री पुष्कर सिंह धामी यांनी दिली आहे.
हरिद्वारचे एसएसपी अजय सिंह यांनी सांगितलं की, “हा अपघात पहाटे ५.३० च्या दरम्यान झाला. ऋषभ पंतची कार डिव्हायडरला धडकली. समोरची विंडशील्ड तुटली आणि तो बाहेर पडला. त्यानंतर कारनं पेट घेतला. प्राथमिक उपचारानंतर लाईफ सपोर्ट असलेल्या रुग्णवाहिकेला पाचारण करण्यात आलं आणि त्याला डेहराडूनच्या मॅक्स हॉस्पिटलमध्ये पाठवण्यात आलं.” “आम्ही डॉक्टरांशी बोललो आहोत. डॉक्टरांनी सांगितलं की, प्राथमिक तपासणीत जीवघेणं असं काहीही समोर आलेलं नाही. कोणतीही अंतर्गत दुखापत नाही. पायाला दुखापत आहे. पाठीला खरचटलं आहे. डोक्यालाही जखम आहे. बाकी एक्स- रे रिपोर्ट आल्यानंतरच कळेल.”
