नवी मुंबई विमानतळावर मोफत हाय-स्पीड वाय-फाय, डिजिटल सुविधा उपलब्ध होणार

नवी मुंबई विमानतळावर मोफत हाय-स्पीड वाय-फाय, डिजिटल सुविधा उपलब्ध होणार

नवी दिल्ली: अदाणी समूहाच्या नवी मुंबई आंतरराष्ट्रीय विमानतळावर (एनएमआयएएल) 25 डिसेंबरपासून व्यावसायिक सेवा सुरू होत असून, प्रवाशांसाठी मोफत हाय-स्पीड वाय-फाय आणि डिजिटल-फर्स्ट प्रवासी संवाद प्रणाली उपलब्ध होणार आहे.

सूत्रांनी दिलेल्या माहितीनुसार, विमानतळाच्या वाय-फाय नेटवर्कशी कनेक्ट होणाऱ्या प्रवाशांना ‘अदाणी वनअॅप’ द्वारे तात्काळ (रिअल-टाइम) माहिती मिळेल. हे अ‍ॅप व्हर्च्युअल असिस्टंटप्रमाणे काम करून टर्मिनलमधील महत्त्वाच्या ठिकाणी प्रवाशांना मार्गदर्शन करेल.

वाय-फायशी जोडलेल्या या अ‍ॅपमधून फ्लाइटची स्थिती, बोर्डिंग गेटची माहिती, वेळापत्रक आणि इतर महत्त्वाच्या सूचना थेट मोबाईलवर मिळतील. त्यामुळे माहिती काउंटर आणि डिस्प्ले बोर्डवर अवलंबून राहण्याची गरज कमी होईल, तसेच प्रवाशांना वेळेवर आणि वैयक्तिक माहिती मिळेल.

अदाणी वनअॅपवर खाद्यपदार्थ आणि पेय स्टॉल, रिटेल दुकाने, लाऊंज आणि टर्मिनलमधील इतर सुविधांची माहितीही दिली जाईल, ज्यामुळे प्रवासी विमानतळावरचा आपला वेळ अधिक चांगल्या पद्धतीने नियोजित करू शकतील.

एनएमआयएएलकडून संपूर्ण टर्मिनलमध्ये 10 एमबीपीएस पर्यंतचा मोफत वाय-फाय दिला जाणार आहे. विमानतळ अधिकाऱ्यांच्या माहितीनुसार, गर्दीच्या वेळेतही इंटरनेट नेटवर्क वेगवान आणि सुरळीत चालेल अशी ही व्यवस्था करण्यात आली आहे. यामुळे मेसेजिंग, डिजिटल पेमेंट, अ‍ॅपवरून कॅब बुकिंग, ई-मेल, स्ट्रीमिंग आणि व्हिडिओ कॉल सहज करता येतील.

कनेक्टिव्हिटी योजनेचा भाग म्हणून एनएमआयएएलने विमानतळावर मोबाईल नेटवर्क सेवा देण्यासाठी सरकारी कंपनी भारत संचार निगम लिमिटेड (बीएसएनएल) सोबत भागीदारी केली आहे. ही भागीदारी सरकारच्या ‘मेड इन इंडिया’ उपक्रमाशी सुसंगत असून, बीएसएनएल कडून सी-डॉट, तेजस नेटवर्क्स आणि टीसीएस यांनी विकसित केलेल्या स्वदेशी दूरसंचार पायाभूत सुविधांचा वापर केला जाणार आहे.

बीएसएनएल देशभरात आपले स्वदेशी 4G नेटवर्क सुरू करत असून, हे नेटवर्क 4G/5G साठी तयार आहे. मुंबईसह प्रमुख शहरांमध्ये लवकरच 5G सेवा सुरू करण्याचीही योजना आहे. नवी मुंबई विमानतळावर बीएसएनएल प्रवासी, विमानतळ कर्मचारी आणि विमानतळाच्या कामकाजासाठी व्हॉईस आणि डेटा सेवा देणार असून, या सेवा वाय-फाय नेटवर्कला पूरक ठरणार आहेत.

मुंबईचे दुसरे विमानतळ म्हणून विकसित होत असलेले नवी मुंबई आंतरराष्ट्रीय विमानतळ सुरुवातीला मर्यादित फ्लाइट हाताळेल. त्यानंतर टप्प्याटप्प्याने फ्लाइटची संख्या वाढवली जाईल. उद्घाटनापूर्वी सर्व डिजिटल सेवा सुरळीत चालाव्यात यासाठी सध्या ऑपरेशनल रेडिनेस चेक आणि सिस्टम ट्रायल सुरू आहेत, असे अधिकाऱ्यांनी सांगितले.

अदाणी समूहाचा 74 टक्के हिस्सा असलेल्या एनएमआयएएल कडून विकसित करण्यात येत असलेल्या या विमानतळावर 25 डिसेंबरपासून व्यावसायिक सेवा सुरू होणार आहेत.

सुमारे 19,650 कोटी रुपयांच्या खर्चाने उभारलेल्या या विमानतळाच्या पहिल्या टप्प्यात दरवर्षी 2 कोटी प्रवासी हाताळण्याची क्षमता असेल. पुढील टप्प्यांत ही क्षमता 9 कोटी प्रवाशांपर्यंत वाढवण्याची योजना असून, यामुळे मुंबईतील सध्याच्या विमानतळावरील ताण कमी होईल आणि परिसरातील हवाई वाहतुकीच्या दीर्घकालीन वाढीस मदत होईल.