कोल्हापूर (प्रतिनिधी) — शिवाजी विद्यापीठातील भौतिकशास्त्र विभागाने ४ जानेवारी २०२४ रोजी “उच्चशिक्षणातील आंतरराष्ट्रीय संधी” या व्याख्यानाचे आयोजन केले होते. या कार्यक्रमाचा उद्देश उच्चशिक्षणातील संधीची माहिती देणे हा होता. कार्यक्रमाचे वक्ते प्रा. दीपक डुबल, क्वीन्सलँड युनिव्हर्सिटी ऑफ टेक्नॉलॉजी, ऑस्ट्रेलिया यांनी त्यांचा शैक्षणिक प्रवास, सध्याचे संशोधन आणि उपलब्ध असलेल्या संशोधन आणि उच्चशिक्षणातील विविध संधींवर प्रकाश टाकला. कार्यक्रमाचे प्रास्ताविक व प्रा.दुबल यांचा परिचय अधिविभागप्रमुख प्रा. आर. जी. सोनकवडे यांनी करून दिला. भौतिकशास्त्र विभाग ज्ञान वाढवण्यासाठी आणि विद्यार्थ्यांना जागतिक स्तरावर उत्कृष्ट कामगिरी करण्यासाठी मौल्यवान संधी उपलब्ध करून देण्यासाठी प्रयत्नशील असल्याचें नमूद केले कार्यक्रमाचे अध्यक्ष मा. प्र-कुलगुरू, प्रा. पी. एस. पाटील होते. त्यांच्या हस्ते प्रा. दुबल यांचा सत्कार झाला. प्रा. पी. एस. पाटील, यांनी आपल्या अध्यक्षीय भाषणात नवीकरणीय ऊर्जा निर्मिती व साठवण क्षेत्रातील नूतनीकरणक्षम ऊर्जा स्रोतांच्या संशोधनाच्या महत्त्वावर भर दिला आणि विद्यार्थ्यांना केवळ त्यांच्या क्षेत्रात मास्टर्स बनण्यासाठी नव्हे तर प्रभुत्व मिळविण्यासाठी प्रयत्न करण्यास प्रवृत्त केले. प्रा. के. वाय. राजपुरे यांनी प्रा. डुबल यांच्या शैक्षणिक कारकिर्दीचे कौतुक करून प्रेरणादायी टिपण्णी दिली. डॉ. उमेश चौगले यांनी चर्चासत्र यशस्वी करण्यासाठी सर्वांनी घेतलेल्या परिश्रमाचे कौतुक करून आभार मानले. नेहा आणि साधना या भौतिकशास्त्र विभागाच्या विद्यार्थिनींनी या कार्यक्रमाचे कुशलतेने सूत्रसंचालन केले. या कार्यक्रमात एलबीएस सातारा, राजाराम कॉलेज कोल्हापूर, न्यू कॉलेज कोल्हापूर, एसजीयू अतिग्रे, सायन्स कॉलेज सोळाकूर, आदींसह कॅम्पसमधील आणि बाहेरील विविध विभागांतील विद्यार्थी, प्राध्यापक आणि अधिविभागप्रमुख यांचा सक्रिय सहभाग होता. औपचारिकतेनंतर झालेल्या संवादात्मक सत्राला चांगला प्रतिसाद मिळाला आणि विद्यार्थी-केंद्रित दृष्टिकोनासाठी कार्यक्रमाचे खूप कौतुक झाले. सदर कार्यक्रमासाठी शिवाजी विद्यापीठाचे कुलगुरू मा. डी. टी. शिर्के, प्र. कुलगुरू मा. पी. एस. पाटील आणि कुलसचिव मा. व्ही. एन. शिंदे यांच्या पूर्ण पाठिंब्यामुळे आणि प्रोत्साहनामुळेच हे सर्व शक्य होत आहे असे भौतिकशास्त्र अधिविभागप्रमुख प्रा. आर. जी. सोनकवडे यांनी सांगितले