गोशाळा अनुदानासाठी 19 जुलै पर्यंत अर्ज करावेत

कोल्हापूर : गोवर्धन गोवंश सेवा केंद्र योजनेंतर्गत जिल्ह्यातील करवीर तालुका वगळून उर्वरित शिरोळ, हातकणंगले, कागल, पन्हाळा, शाहूवाडी, राधानगरी, भुदरगड, आजरा, गडहिंगलज, चंदगड व गगनबावडा तालुक्यातून योजना राबविण्यासाठी अर्ज मागविण्यात येत आहेत. प्रत्येक तालुक्यातून एका गोशाळेसाठी अनुदान देण्यात येणार असून इच्छुकांनी आपले अर्ज दि. 19 जुलै 2023 पर्यंत सादर करावेत, असे आवाहन प्रभारी जिल्हा पशुसंवर्धन आयुक्त डॉ. एस. आर. भरते यांनी केले आहे.

इच्छुकांनी विहित नमुन्यातील परिपूर्ण अर्ज आपल्या संबंधित तालुक्याच्या पशुधन विकास अधिकारी (विस्तार) पंचायत समिती यांच्याकडे सादर करावेत. जिल्हा पशुसंवर्धन उपआयुक्त कार्यालयाकडे थेट सादर केलेले तसेच ई-मेल किंवा तत्समद्वारे सादर केलेले अर्ज ग्राह्य धरले जाणार नाहीत. तसेच यापूर्वी गोवर्धन गोवंश सेवा केंद्र योजनेंतर्गत सादर करण्यात आलेले अर्ज ग्राह्य धरले जाणार नसल्याने इच्छुक संस्थांनी विहित नमुन्यात नव्याने अर्ज सादर करणे अनिवार्य असल्याचेही डॉ. भरते यांनी पत्रकाव्दारे कळविले आहे.