विरारमध्ये जयंतीच्या मिरवणुकीत मोठी दुर्घटना, जयंतीच्या मिरवणुकीत दोघांचा मृत्यू

विरार : १४ एप्रिल रोजी सर्वत्र डॉ. बाबासाहेब आंबेडकर जयंती साजरी केली जात आहे. विरारमध्ये डॉ. बाबासाहेब आंबेडकर जयंतीनिमित्त पूर्व संध्येला काढण्यात आलेल्या मिरवणुकीत मोठी दुर्घटना घडली आहे.मिरवणुकीवेळी इलेक्ट्रिक वायरला झेंड्याचा स्पर्श झाल्यानं स्फोट झाला. यामध्ये दोन जणांचा जागीच मृत्यू झाल्याची घटना घडली. तर यामध्ये पाच जण गंभीर जखमी झाले आहेत. ही घटना विरार पूर्व कारगिल नगरमध्ये घडली. जखमींवर मुंबईच्या कस्तुरबा रुग्णालयात उपचार सुरु आहेत.

डॉ. बाबासाहेब आंबेडकर यांच्या जयंतीनिमित्त पूर्व संध्येला निघालेली मिरवणूक संपवून परत जात असताना लोखंडी झेंड्याचा पाईप विजेच्या ट्रान्सफार्मरला लागल्याने स्फोट झाला. यामध्ये सहा जण गंभीर भाजले असून, यातील दोन जणांचा जणांचा जागीच मृत्यू झाला. तर तीन जणांची प्रकृती चिंताजनक आहे. त्यांच्यावर मुंबईच्या कस्तुरबा रुग्णालयात उपचार सुरु आहेत. विरार पूर्व कारगिल नगर येथे १० वाजण्याच्या सुमारास ही घटना घडली आहे. या दुर्दैवी घटनेने विरार परिसरात हळहळ व्यक्त केली जात आहे. रुपेश सुर्वे ( वय ३०), सुमित सुध (वय २३) अशी मृत झालेल्यांची नावे आहेत. तर स्मित कांबळे (वय ३२) सत्यनारायण पंडित (वय २३), उमेश कानोजिया (वय १८), राहुल जगताप (वय १८) रोहीत गायकवाड अशी जखमींची नावे आहेत. तसेच डॉ. बाबासाहेब आंबेडकर यांच्या जयंतीनिमित्त राज्यभर उत्साह पाहायला मिळत आहे. काही ठिकाणी रॅली काढून बाबासाहेब आंबेडकर यांना अभिवादन देखील करण्यात येणार आहे.