पुण्यात कारने चिरडल्याने ५ महिला ठार ; १३ जणी जखमी

पुणे : पुणे-नाशिक महामार्गावर असणाऱ्या खेड तालुक्यातील शिरोली गावाजवळ सोमवारी रात्री भीषण अपघात झाला. पुण्याकडून येणाऱ्या चारचाकी वाहनाने महिलांच्या घोळक्याला उडवले. या अपघातात पाच महिलांचा जागीच मृत्यू झाला असून १३ महिला जखमी झाल्या आहेत. या घोळक्यात १८ महिला होत्या, जखमींवर जवळच्या रुग्णालयात उपचार सुरू आहेत.

         पोलिसांकडून मिळालेली अधिक माहिती अशी  खरपुडी फाट्यावर असणाऱ्या मंगल कार्यालयात या १७ महिला लग्न कार्यक्रमात वाढपी आणि स्वयंपाक कामासाठी आल्या होत्या. पुण्याच्या वेगवेगळ्या भागातून या महिला आल्या होत्या. मंगल कार्यालय दुसऱ्या बाजूला असल्याने त्या सर्वजणी रस्ता क्रॉस करत होत्या. मात्र पुण्याच्या दिशेकडून आलेल्या एका भरधाव चारचाकी वाहनाने घोळक्याला जोरात धडक दिली. रात्रीच्या वेळी पोलीस जात असताना हा प्रकार समोर आला. तसंच या अपघातातील मृतांची संख्या वाढण्याची भीतीही वर्तवण्यात येत आहे. सुशीला देढे, इंदुबाई कोंडीबा कांबळे ( वय ४६) अशी दोन मृत महिलांची नावे असून अन्य मृतांची नावे समजू शकली नाहीत.
       पोलिसांनी तातडीने मदत पुरवल्याने जखमी महिलांना लवकर उपचार मिळाले. प्रशासकीय यंत्रणेसोबत तातडीने संपर्क करुन जखमी महिलांना रुग्णालयात दाखल करण्यात आले. चांडोली ग्रामीण रुग्णालयासह राजगुरूनगर परिसरातील चार ते पाच खासगी रुग्णालयात जखमींना उपचारासाठी दाखल करण्यात आले. त्यांच्यावर सध्या उपचार सुरू आहेत.