हा आतापर्यंत मी केलेल्या सर्वांत कठीण सीक्वेन्सपैकी एक होता,” मोहक मटकर

Oplus_131072

हा आतापर्यंत मी केलेल्या सर्वांत कठीण सीक्वेन्सपैकी एक होता,” मोहक मटकर
झी टीव्हीवरील ‘सरु’ प्रेक्षकांना भावनांचा आणि थराराचा संगम असलेला दमदार सीक्वेन्स दाखवणार आहे. एका धक्कादायक वळणात अनिका (अनुष्का मर्चंडे) सरु (मोहक मटकर) ला वॉटर टँकमध्ये बंद करून त्यात पाणी सोडते, ज्यामुळे सरु त्यात अडकून पडते आणि सुटण्यासाठी धडपड करते. हा प्रसंग जिवंत करण्यासाठी मोहकला शारीरिकदृष्ट्या मोठा ताण सहन करावा लागला पण तिने हे आव्हान उत्साहाने आणि पूर्ण समर्पणाने स्वीकारले.
मोहकला वॉटर टँकमधील बंदिस्त जागेसाठी स्वतःला मानसिकरीत्या तयार करावे लागले तसेच वाढत्या पाण्याशी शारीरिकरीत्या जुळवून घ्यावे लागले. भीती आणि हतबलतेचे भाव व्यक्त करत मर्यादित जागेत हालचाल करण्याचा संघर्ष – प्रत्येक गोष्ट तिने प्रॉडक्शन टीमसोबत सराव करून अधिक वास्तववादी बनवली. या सीक्वेन्ससाठी अनेक टेक घ्यावे लागले आणि पूर्ण दिवस शूटिंग चालले, ज्यामध्ये मोहकने प्रचंड मेहनत घेतली. सर्व सुरक्षा उपाय असूनही शूटदरम्यान तिला किरकोळ दुखापत झाली पण हा सीक्वेन्स पूर्ण करण्याचा तिचा निर्धार मात्र अजिबात ढळला नाही.
मोहक मटकर म्हणाली, “‘सरु’मध्ये आतापर्यंत मी केलेल्या सीक्वेन्सपैकी हा नक्कीच सर्वांत कठीण होता. जेव्हा मी टँकमध्ये उतरले आणि माझ्याभोवती पाणी वाढताना जाणवले तेव्हा तो अनुभव मी याआधी केलेल्या कुठल्याही गोष्टीपेक्षा पूर्णपणे वेगळा होता. तो खूपच थकवणारा आणि शारीरिकदृष्ट्या आव्हानात्मक होता, पण मला स्क्रीनवर ती हतबलता खरी वाटावी असं वाटत होतं. काही क्षणी ते खूप कठीणही वाटलं, पण मी स्वतःला आठवण करून दिली की ‘सरु’ एक लढवय्या आहे, आणि मला माझ्या अभिनयात तिची तीच जिद्द मला दाखवायची आहे. या सगळ्यात मला सर्वात जास्त बळ दिले ते टीमच्या सततच्या प्रोत्साहनाने. त्यांनी मला सुरक्षित वाटेल याची काळजी घेतली आणि स्वतःला अजून पुढे ढकलण्याची ताकद दिली. जेव्हा प्रेक्षक हा सीक्वेन्स पाहतील तेव्हा त्यांना मी केलेला संघर्ष आणि तीव्रता नक्कीच जाणवेल अशी माझी आशा आहे.”
सरु सगळ्या अडचणींशी झुंज देत असताना हा धक्कादायक ट्विस्ट प्रेक्षकांना खिळवून ठेवणार आहे. ती अनिकाच्या सापळ्यातून सुटू शकेल का? ती लढा देत राहील की हार मानेल?