no images were found
संजीवनी ब्लड ग्रुप रजिस्ट्री अॅप’च्या माध्यमातून तत्काळ रक्त उपलब्ध होण्याचा मार्ग खुला: जीवनदायी उपक्रमाचा नवा अध्याय सुरू – आरोग्यमंत्री प्रकाश आबिटकर
वोक्हार्ट फाऊंडेशन’च्या संकल्पनेतून विकसित झालेल्या आणि एलआयसी हौसिंग फायनान्स लिमटेडचे सीएसआर अर्थसहाय्य मिळालेल्या ‘संजीवनी ब्लड ग्रुप रजिस्ट्री अॅप’ या अत्यंत महत्वाच्या अशा अॅपचे लोकार्पण महाराष्ट्राचे सार्वजनिक आरोग्य आणि कुटुंब कल्याणमंत्री श्री प्रकाश आबीटकर यांच्या हस्ते २५ ऑगस्ट रोजी मुंबईत आरोग्य भवन येथे झाले.
या अॅपच्या निर्मितीमध्ये आरोग्य विभागाच्या एसबीटीसीचे अर्थात स्टेट ब्लड ट्रान्सफ्युजन कौन्सिलचे मोलाचे मार्गदर्शन लाभले आहे. या उद्घाटन सोहळ्याला आरोग्य विभागातील डॉ नितीन अंबाडेकर, ,एलआयसी हौसिंग फायनान्सच्या ‘सीएसआर’ आणि ‘ईएसजी’च्या सह-महाव्यवस्थापक अनिथा पी एस कुमारी आणि ‘सीएसआर प्रोजेक्ट लीड श्री यश जैन, फेस्कॉम या ज्येष्ठ नागरिक स्वयंसेवी संस्थेचे सुरेश पोटे व इतर प्रतिनिधी तसेच ‘वोक्हार्ट फाऊंडेशन’च्या डॉक्टर पल्लवी छनाना आणि उर्वरित प्रकल्प चमू आणि इतर मान्यवर उपस्थित होते.
रक्तदाता आणि ब्लड बँका यांच्यामध्ये सुयोग्य संपर्क नसल्यामुळे अनेक वेळा गरजू रुग्णांना रक्त मिळवण्यासाठी शर्थीचे प्रयत्न करावे लागतात. त्यामुळे आवश्यक रक्ताची गरज आणि रक्ताचा पुरवठा यातील संतुलन बिघडून जाऊन अनेकवेळा रक्त वेळेवर उपलब्ध न झाल्याने रुग्णांच्या प्राणांशी गाठ येते. अनेक अपघात, शस्त्रक्रिया, गरोदर माता, थॅलेसेमिया, कर्करोग आणि गंभीर आजारांमुळे रक्ताची तातडीची गरज भासत असते आणि ते वेळेवर उपलब्ध न झाल्यास निरपराध जीव धोक्यात येतात.
त्यावर मात करण्यासाठीच हे अॅप सर्वसामान्यांसाठी संपूर्ण विनामुल्य उपलब्ध करून देण्यात आले आहे. ते ‘गुगल प्ले’वरून ‘संजीवनी ब्लड ग्रुप रजिस्ट्री अॅप’ (SANJIVANI BLOOD GROUP REGISTRY APP) या नावाने डाउनलोड करता येऊ शकेल. यातील संपूर्ण माहिती एन्क्रिप्शनद्वारे सुरक्षित आणि गोपनीय ठेवण्यात येते. आरोग्य विभाग आणि ‘एसबीटीसी’च्या मार्गदर्शनाखाली आपत्कालीन परिस्थितीत इतरत्र रक्तदाते शोधण्याऐवजी ब्लड बँका थेट या अॅपमध्ये नोंदणीकृत असणाऱ्या जास्तीत जास्त रक्तदात्यांपर्यंत एका क्लिकद्वारे पोहचू शकतील. अशा वेळेस रक्तदात्यांना त्यांच्या फोनवर नोटिफिकेशन येईल व त्यांना त्यांच्या उपलब्धतेनुसार रक्तदान करता येईल की ज्यामुळे गरजेच्या वेळी रक्तदान केल्याचं समाधान देखील रक्तदात्याना लाभेल.
सार्वजनिक आरोग्यमंत्री श्री प्रकाश आबिटकर यांनी सध्यपरिस्थितीमध्ये ‘एसबीटीसी’ व आरोग्य विभाग हे रक्तदानाच्या क्षेत्रात अत्यंत महत्वपूर्ण काम करत आहेत, असे उद्गार काढले. “एनजीओ’ व ‘सीएसआर’ यांची मदत घेत सामाजिक कार्य कसे बळकट होऊ शकते याचा एक परिपाठ ‘एलआयसीएचएफएल’ व ‘वोक्हार्ट फाउंडेशन’ने घालून दिला आहे. त्यांचे आभार मानावे तेवढे कमी आहेत.
‘फेस्कॉम’सारखी ज्येष्ठ नागरिकांसाठी काम करणारी संस्था यात सहभागी झाली त्याबद्दल त्यांचेही आभार. राज्यातील १८ ते ६५ वयोगटातील जास्तीत जास्त लोकांनी या उपक्रमात सहभागी होण्याची गरज आहे,” असे उद्गार कार्यक्रमाचा समारोप करताना श्री प्रकाश आबिटकर यांनी काढले. त्यांनी राज्यातील लोकांनी अधिकाधिक प्रतिसाद देत रक्तदान करावे असे आवाहनसुद्धा केले.
लोकार्पण कार्यक्रमात एलआयसी हौसिंग फायनान्सच्या अनिथा पी एस कुमारी यांनी आपले मनोगत व्यक्त करताना म्हटले की रक्तदात्यांना आणि गरजू रुग्णांना जोडणारा हा उपक्रम म्हणजे तंत्रज्ञान व मानवतेचा एक अनोखा असा संगम आहे. “अशा प्रकारे ‘सीएसआर’च्या माध्यमातून रक्तदान सुरळीत करण्यासाठी हा उपक्रम राबविणारे महाराष्ट्र हे पहिले राज्य ठरू शकेल, असा मला ठाम विश्वास आहे,” त्या म्हणाल्या.
“संजीवनी ब्लड ग्रुप रजिस्ट्री अॅप’ हे रक्तदाते व रक्तपेढ्यांना एका डिजिटल व्यासपीठावर जोडणारं साधन असून या माध्यमातून रक्तसंकलन अधिक वेगवान व सुलभ होईल,” असे मत ‘वोक्हार्ट फाऊंडेशनच्या डॉक्टर पल्लवी छनाना यांनी मांडले.
