महाराष्ट्र शिकाऊ उमेदवारी प्रोत्साहन योजनेचा लाभ घेण्यासाठी मुलभूत प्रशिक्षण संस्थेशी संपर्क साधा

कोल्हापूर: महाराष्ट्र शिकाऊ उमेदवारी प्रोत्साहन योजनेचा लाभ घेण्यासाठी ज्या शिकाऊ उमेदवारांनी (Apprentices) दिनांक 3 जून 2021 पासून शिकाऊ उमेदवारी प्रशिक्षण पूर्ण केले आहे किंवा सद्या करीत आहेत अशा सर्व शिकाऊ उमेदवारांनी https://maps.dvet.gov.in या पोर्टलवर नोंदणी करुन महाराष्ट्र शिकाऊ उमेदवारी प्रोत्साहन योजनेंतर्गत दरमहा विद्यावेतन प्राप्त करण्यासाठी अर्ज करावेत. नोंदणी व अर्ज करताना काही तांत्रिक अडचण उद्भभवल्यास उमेदवारांनी संबंधित आस्थापनांशी किंवा संबंधित मुलभूत प्रशिक्षण तथा अनुषंगिक सूचना केंद्रांशी संपर्क साधावा, असे आवाहन व्यवसाय शिक्षण व प्रशिक्षण संचालनालयाचे संचालकांनी केले आहे.

  केंद्र शासनाच्या राष्ट्रीय शिकाऊ उमेदवारी प्रोत्साहन योजनेच्या धर्तीवर कौशल्य विकास, रोजगार व उद्योजकता विभागाच्या शासन निर्णया अन्वये शासकीय, निमशासकीय आणि खासगी आस्थापनांमध्ये शिकाऊ उमेदवारी प्रशिक्षण कायदाअंतर्गत शिकाऊ उमेदवारांची भरती वाढवून प्रोत्साहीत करण्यासाठी “महाराष्ट्र शिकाऊ उमेदवारी प्रोत्साहन योजना (Maharashtra Apprenticeship Promotion Scheme MAPS)” राज्यात राबविण्याबाबत निर्णय घेण्यात आला आहे. या योजनेअंतर्गत प्रशिक्षण घेणाऱ्या शिकाऊ उमेदवारांना (Apprentices) देय विद्यावेतनाच्या 75 टक्के किंवा जास्तीत जास्त 5 हजार रुपये यापैकी कमी असलेले विद्यावेतन शिकाऊ उमेदवारांना शासनातर्फे अनुज्ञेय आहे. तथापि, राष्ट्रीय शिकाऊ उमेदवारी प्रोत्साहन योजनेअंतर्गत आणि महाराष्ट्र शिकाऊ उमेदवारी प्रोत्साहन योजनेअंतर्गत शिकाऊ उमेदवारांना अनुज्ञेय ठरणारा विद्यावेतनाचा आर्थिक लाभ एकत्रितपणे देय एकूण 75 टक्के पेक्षा अधिक अनुज्ञेय ठरणार नाही.

 योजनेची सविस्तर माहिती व अर्ज करण्याची सर्वकष माहिती https://maps.dvet.gov.in या पोर्टलवर देण्यात आली आहे. सर्व संबंधित आस्थापनांनी त्यांच्या अखत्यारीतील प्रशिक्षण पूर्ण केलेल्या व करीत असलेल्या शिकाऊ उमेदवारांनी https://maps.dvet.gov.in या पोर्टलवर सादर केलेल्या विद्यावेतनाच्या अर्जाची तपासणी करून मान्यता द्यावी, असे आवाहन औद्योगिक प्रशिक्षण संस्थेचे प्राचार्य एम.एस.आवटे यांनी केले आहे.