‘वंशज’ मध्ये मोना वासू यांची एंट्री

सोनी सबवरील ‘वंशज’ मालिकेत कुटुंबातील पारंपरिक व्यवसाय वारसा घेण्याबाबत  संघर्षाचा विषय मांडण्यात आला आहे. या वारसा हक्काच्या पारंपरिक पद्धतीमुळे युविका (अंजली तत्रारी) आणि दिग्विजय महाजन उर्फ डीजे (माहीर पांधी) या भावंडांमध्ये वाद दिसून येतोय. महाजन ग्रुप ऑफ कंपनीजच्या मालकी हक्काचा हा वाद आहे. पुढील भागांत, दीर्घ संघर्षानंतर युविका अखेर महाजन कुटुंबाच्या व्यवसायाचे नेतृत्व स्वीकारते. पुढे ती व्यवसाय वाढवते, अनेक करार करते. याद्वारे ती महाजन कुटुंबाचा अनेक वर्षांपासूनचा स्पर्धक तलवार कुटुंबाच्या व्यवसायालाही मागे टाकते.

 मालिकेत प्रसिद्ध अभिनेत्री मोना वासू या शालिनी तलवारच्या भूमिकेत दिसतील. तलवार कुटुंबातील अत्यंत सुंदर, बुद्धिवान स्त्री.. महाजन कुटुंबाने त्यांचे कुटुंब उद्ध्वस्त केल्याची अत्यंत दृढ भावना तिच्या पात्रात खोलवर रुजली आहे. महाजन कुटुंबाबद्दलचा तिरस्कार शालिनीच्या आत रुजला असल्याने त्यांचा बदला घेण्याचा निश्चयच तिने केलेला आहे. ‘वंशज’ मालिकेत पुढील भागात महाजन कुटुंबाला जबरदस्त धक्का देण्याची तयारी तलवार कुटुंबाने केली असल्याने या कथानकात अनेक वळणं येणार आहेत.

शालिनी तलवारचे पात्र साकारणाऱ्या मोना वासू म्हणतात,“वंशजमधील हे पात्र साकारण्यासाठी मी खूप उत्सुक आहे. अत्यंत भेदक  आणि शक्तिशाली असे हे पात्र कोणतीही परिस्थिती अत्यंत शिताफीने हाताळू शकते. शालिनीच्या प्रवेशामुळे दोन्ही कुटुंबादरम्यानचे शत्रुत्व आणखी वाढते. ती शक्तिशाली, आत्मविश्वासू आणि यशस्वी आहे, पण तिच्या हृदयात तिने खूप मोठी रहस्ये दडपून ठेवली आहेत, जी तिच्यासाठीही खूप त्रासदायक आहेत. ही रहस्ये बाहेर आली तर तिने अत्यंत काळजीपूर्वक घडवलेले जीवन पूर्णपणे उध्वस्त होईल, तिच्या मुलाकडून मिळणारे प्रेम, आदर नष्ट होईल, अशी भीती तिला वाटत असते. या पात्राची बुद्धिमत्ता, उत्साह आणि आयुष्यातील जिद्द साकारण्यासाठी मी उत्सुक आहे.”