अंधेरीतून डॉन दाऊद इब्राहिम टोळीचा सदस्य रियाझ भाटीला अटक

मुंबई : कुख्यात डॉन दाऊद इब्राहिम याच्या टोळीचा सदस्य तसेच नजीकचा हस्तक असलेला रियाझ भाटी यास मुंबई पोलिसांनी अटक केली आहे. रियाझ भाटी याने एका व्यावसायिकाकडून खंडणी उकळली होती. याच प्रकरणी पोलिसांनी कारवाई करत भाटी यास अटक केली. रियाझ भाटी हा अंडरवर्ल्ड डॉन दाऊद इब्राहिमच्या टोळीचा एक सदस्य असून दाउदचा जवळचा हस्तक अशी रियाझची ओळख आहे.

अंधेरीतील एका व्यावसायिकाला रियाझ आणि छोटा शकीलचा नातेवाईक सलीम फ्रूट याने जीवे मारण्याची धमकी देत त्याच्याकडून महागडी वाहने व पैसेही उकळले होते. याच प्रकरणाशी संबंधित मुंबई गुन्हे शाखेच्या खंडणीविरोधी पथकाकडून त्याला अटक करण्यात आली आहे.

गुन्हे शाखेच्या पुढील तपासासाठी सलीम फ्रुटच्या कोठडीचीही मागणी केली आहे. त्यासाठी त्यांनी एनआयए कोर्टात अर्ज केला आहे. आज पोलिस रियाझ भाटीला न्यायालयात हजर करून त्याच्या कोठडीची मागणी करणार आहे.