वागले की दुनिया: नई पीढी नए किस्से या मालिकेने पूर्ण केले 1000 एपिसोड

सोनी सबवरील ‘वागले की दुनिया: नई पीढी नए किस्से’ मालिकेच्या अर्थपूर्ण आणि सामान्य माणसाच्या जीवनाशी सुसंबद्ध कथानकाने प्रेक्षकांच्या अंतःकरणात खास स्थान निर्माण केले आहे. मुंबईच्या पार्श्वभूमीवर घडणाऱ्या या कथेत सामान्य माणसाचे संघर्ष, आनंद, यश यांचे चित्रण केलेले असते. 1000 एपिसोडचा महत्त्वाचा टप्पा पूर्ण करणारी ही मालिका आजही प्रभावी कथानके सादर करून प्रेक्षकांचे मनोरंजन करत आहे.

ही मालिका घराघरात पोहोचवण्यात महत्त्वाचे योगदान देणारे या मालिकेचे कलाकार आहेत- राजेश वागलेची भूमिका करणारा सुमित राघवन, वंदना वागले साकारणारी परिवा प्रणती, सखीच्या रूपात दिसणारी चिन्मयी साळवी आणि अथर्वच्या रूपात दिसणारा शीहान कपाही. गेल्या 1000 भागांमध्ये या  मालिकेने समाजातील काही महत्त्वाच्या मुद्द्यांना स्पर्श केला आहे. या मालिकेने स्तनाच्या कर्करोगाविषयीची जागरूकता, मानसिक आरोग्याच्या समस्या यांसारख्या गंभीर समस्यांपासून ते भारतीय मध्यमवर्गीय कुटुंबातील दैनंदिन आव्हाने यांसारखे विषय हाताळले आहेत. हे असे विषय आहेत जे देशभरातील जनतेला स्पर्श करतात. हे विषय हाताळून त्या विषयावर एक अर्थपूर्ण चर्चा सुरू करून प्रेक्षकांना त्यात गुंतविण्याचे काम या मालिकेने केले आहे. 1000 एपिसोड पूर्ण केल्याचा आनंद साजरा करताना वागले की दुनिया ही मालिका हृदयस्पर्शी कथा, संबद्ध विषय आणि सामान्य माणसाला सामोरे येणारे प्रश्न यांचे चित्रण आपल्या कथानकांतून करत राहण्याची हमी देत आहे.

राजेश वागलेची भूमिका करणारा सुमित राघवन म्हणाला,“वागले की दुनिया मालिकेने 1000 एपिसोडचा टप्पा गाठणे ही एक लक्षणीय सिद्धी आहे. आमचा हा प्रवास एका साध्या उद्देशाने सुरू झाला होता: सामान्य माणसाच्या दैनंदिन कथा आणि व्यथा सांगणे! आज ही मालिका म्हणजे आपल्या जीवनाचा आरसा बनली आहे. ज्यामध्ये आपली स्वप्ने, आव्हाने, आनंद आणि भारतीय कुटुंबाचे दैनिक जीवन सामावलेले आहे. आमच्या प्रेक्षकांना अनुभवास येणाऱ्या दैनंदिन गोष्टी सादर करताना आम्हाला खूप मजा येते. यापुढच्या वाटचालीत देखील प्रेक्षकांच्या अंतःकरणाला स्पर्श करणाऱ्या आणि त्यांना आपल्याशा वाटणाऱ्या गोष्टी सादर करण्यास आम्ही वचनबद्ध आहोत. हा प्रवास अत्यंत सार्थक होता आणि प्रेक्षकांनी आम्हाला दिलेल्या समर्थनाबद्दल मी कृतज्ञ आहे आणि त्यांच्याशी जुळलेले हे नाते उत्तरोत्तर अधिक दृढ होत जाईल अशी माझी अपेक्षा आहे.”

वंदना वागलेची भूमिका करणारी परिवा प्रणती म्हणाली,“वागले की दुनिया मालिकेच्या सोबतीने 1000 एपिसोड पूर्ण करणे हा एक असामान्य टप्पा आहे. या प्रवासाचा भाग असल्याचा मला अभिमान वाटतो. वंदना वागलेच्या रूपाने मी एका अर्थपूर्ण पद्धतीने प्रेक्षकांशी संवाद साधला आहे आणि भारतीय कुटुंबात दैनंदिन जीवनात घडणाऱ्या गोष्टी त्यांच्याशी शेअर केल्या आहेत. ही मालिका म्हणजे केवळ मनोरंजन असे समीकरण कधीच नव्हते! यात प्रेक्षकांचे अनुभव आणि त्यांच्या भावना चित्रित करण्यात आल्या आहेत, त्यामुळे ही मालिका माझ्या अंतःकरणाच्या खूप जवळ आहे.”