हिजाबवरून इराण पेटले, महिलेचा पोलीस कोठडीत मृत्यू

हिजाबवरून इराण पेटले, महिलेचा पोलीस कोठडीत मृत्यू

तेहरान : इराणमध्ये पोलिसांच्या कोठडीतील महिलेचा मृत्यू झाल्यानंतर देशात महिला ठिकठिकाणी निदर्शनं करताना दिसत आहेत. इराणमध्ये असलेल्या कठोर हिजाब नियमांचे उल्लंघन केल्याप्रकरणी 22 वर्षीय महिलेला पोलिसांनी ताब्यात घेतलं होतं.त्या महिलेचा मृत्यू हा हृदयविकाराने झाल्याचे पोलिसांनी सांगितले. पण पोलिसांच्या अत्याचारामुळेच त्या महिलेचा मृत्यू झाला असावा असे लोक म्हणत आहे. या घटनेचा निषेध करण्यासाठी इराणमध्ये महिला रस्त्यावर उतरल्या आहेत आणि त्यांनी हिजाब जाळून आपला निषेध नोंदवला आहे.

गेल्या पाच दिवसांपासून इराणमध्ये निदर्शनं सुरू आहेत आणि याचा प्रभाव अनेक शहरांमध्ये दिसून आला आहे.

तीन दिवस कोमात राहिल्यानंतर 22 वर्षीय महसा अमिनीचं रुग्णालयात निधन झालं. तेहरानच्या सारी भागात आंदोलक जमा झाले आणि त्यांनी हिजाब पेटवून निषेध व्यक्त केला.

अमिनी यांना इराणच्या मोरालिटी पोलिसांनी अटक केली होती. महिलांनी आपले केस हिजाबने पूर्णपणे झाकावेत आणि हात, तसेच पायांवर सैल वस्त्रं असावेत असा नियम आहे. पोलिसांनी ताब्यात घेतल्यावर अमिनी या कोसळल्या आणि नंतर त्या कोमात गेल्या. पोलिसांनी त्यांच्याजवळ असलेल्या दंडुक्याने त्यांच्या डोक्यावर प्रहार केल्यानंतर त्या कोसळल्या असं म्हटलं जात आहे. त्यांना पकडल्यानंतर त्यांचं डोकं वाहनांवर आदळल्याचे वृत्त आहे असं युनायेटेड नेशन्सचे मानवाधिकार उच्चायुक्त नदा अल नशीफ यांनी म्हटले आहे.

अमिनी यांच्याशी गैरवर्तणूक केल्याचे पोलिसांनी फेटाळले आहे. अमिनी यांचा मृत्यू हृदयविकाराने झाल्याचे त्यांनी सांगितले. पण अमिनींच्या कुटुंबीयांनी म्हटले आहे की अमिनी या सदृढ होत्या. ज्या भागात अमिनी राहत होत्या त्या कुर्दीस्तान भागात 3 निदर्शकांचा पोलिसांच्या गोळीबारात मृत्यू झाला आहे. इराणचे राष्ट्राध्यक्ष अयातुल्ला अली खमेनेई यांच्या सहकाऱ्यांनी अमिनी यांच्या कुटुंबीयांची भेट घेतली. जर काही नियमांचे उल्लंघन झाले असेल तर त्यावर कारवाई करून न्याय मिळवून दिला जाईल असे, त्यांनी त्यांच्या कुटुंबीयांना सांगितले.