no images were found
कोल्हापुरच्या कविता चावला ठरल्या पहिल्या करोडपती
आता कविता 7 कोटी रुपयांपर्यंत पोहोचणार का?…..
‘कौन बनेगा करोडपती १४’ कार्यक्रमा सुरू असून दिवसेंदिवस कार्यक्रम अधिकच रंजक बनत चालला आहे. या कार्यक्रमाची लोकप्रियता प्रचंड वाढलेली आहे. या गेम शो चे सूत्रसंचालन करणारे अभिनेता अमिताभ बच्चन यांच्यामुळे खरी रंगत येत असते. सद्याचा हा शो 40 दिवस चालला असून यामध्ये अद्याप या पर्वाला करोडपती होणारा स्पर्धक मिळाला नव्हता. 1 करोड ही रक्कम आजवर कुणीही जिंकू शकलेले नाही. परंतु अखेर कोल्हापूरच्या ‘कविता चावला’ या ‘कौन बनेगा करोडपती १४’ च्या पहिल्या करोडपती ठरल्या आहेत.
महाराष्ट्रातील कोल्हापूरात राहणाऱ्या 45 वार्षिय कविता चावला यांनी कौन बनेगा करोडपतीच्या 14 व्या सीजनमध्ये एक कोटी रुपये जिंकले आहेत. या सीझनमध्ये 1 कोटी कमावणाऱ्या त्या पहिल्या स्पर्धक ठरल्या आहेत. याआधीही कविता यांनी ‘कौन बनेगा करोड’ पतीमध्ये सहभाग नोंदवला होता. मात्र त्या हॉटसीटपर्यंत पोहोचू शकल्या नव्हत्या. पण हार न मानता पुन्हा जिद्दीने शोमध्ये परतल्या आणि जिंकल्या सुद्धा.
आता कविता 7 कोटी रुपयांपर्यंत पोहोचणार का, याची उत्सुकता सर्वांना लागली आहे. परंतु त्या विषयी अद्याप कोणतीही माहिती मिळालेली नाही. कविता आपल्या मुलासोबत म्हणजे विवेकसोबत शोमध्ये सहभागी झाल्या होत्या. येत्या सोमवार आणि मंगळवारी हा भाग सोनी टीव्हीवर प्रसारित होणार आहे. त्यामुळे प्रेक्षक हा भाग पाहण्यासाठी मोठ्या प्रमाणावर उत्सुक आहेत.
